घाटनांद्रा : यंदा अतिवृष्टी झाल्यामुळे शेतकऱ्यांचे मोठे नुकसान झाले होत. खरीप हंगाम हातचा गेला. मात्र त्याचे पडसाद रबी हंगामावरही उमटताना दिसत आहेत. घाटनांद्रा परिसरात गेल्या चार-पाच दिवसांपासून थंडीचे प्रमाण कमी-अधिक होऊ लागले आहे. शनिवारी तर दिवसभर ढगाळ वातावरण होते. त्यात सकाळी पावसाच्या सरीदेखील पडल्या. त्यामुळे गहू, हरभरा ही रबी पिके धोक्यात आली असून, हाती आलेली तूरदेखील जाणार, अशी भीती शेतकऱ्यांमध्ये निर्माण झाली आहे.
घाटनांद्रा परिसरात यावर्षी मुबलक पाण्यामुळे रबीचे मोठे क्षेत्र तयार झाले आहे. या हंगामात शेतकरी गहू, तूर, हरभरा, वाल, उडीद या कडधान्यांबरोबरच काकडी, चवळी, वांगी, मिरची, गवार, भेंडी, टोमॅटो, भोपळा, मेथी, मुळा, पालक, करडी ही भाजीपाला पिके घेतात. खरीप हंगामात झालेले आर्थिक नुकसान रबी हंगामात बहुतेकदा भरून काढले जाते.
यावर्षी पावसाची उत्तम सुरुवात झाली. मात्र, प्रमाणापेक्षा जास्त पाऊस झाल्याने कपाशी व मका पिकाचे नुकसान झाले. त्यामुळे कपाशीच्या एक- दोन वेचणीतच काही शेतकऱ्यांनी पिकावर नांगर फिरवून त्या जागी भाजीपाला, गहू, हरभरा आदींची लागवड केली आहे. गहू, हरभरा हे पीक बहरात आले आहे. मात्र, पिकांना पोषक असलेली थंडी गायब झाल्याने व ढगाळ वातावरणामुळे रबी हंगामातील फळपिकांची वाढ खुंटली आहे. त्यामुळे पुन्हा एकदा शेतकरी निसर्गाच्या लहरीपणामुळे अडचणीत सापडला आहे.
------
तूर काळवंडली
ढगाळ वातावरणामुळे तुरीच्या शेंगा काळ्या पडत असल्यामुळे शेतकरी चिंतेत पडला आहे. तूर काळी पडली तर मालाच्या प्रतवारीवर परिणाम होतो. परिणामी, बाजारात दरही घसरतो. लागवडीपासून फवारणी ते बाजारात पोहचेपर्यंत तुरीच्या पिकावर बराच खर्च करावा लागतो. काळसर तुरीला बाजारात अपेक्षित दर मिळत नाही. परिणामी, शेतकऱ्यांच्या हाती फारसे काही पडणार नाही. हे निश्चित.
------
शेतकऱ्यांच्या प्रतिक्रिया
वातावरणात सतत बदल होत असल्याने रबी हंगामातील गहू, हरभरा, तूर या पिकांच्या उत्पादनात यावर्षी मोठी घट झाली आहे.
-कचरू मोरे, शेतकरी
वातावरणात बदल होत असून, त्याचा परिणाम मनुष्याबरोबरच पिकांवरही होताना दिसत आहे. पिकांना अनुकूल वातावरण मिळत नसल्याने रोपांची वाढ खुंटली आहे. असेच वातावरण राहिल्यास हातात आलेली पिके जातील.
-अमोल चौधरी, शेतकरी