गंगापूर : तालुका शिक्षक पतसंस्थेत अध्यक्षांनी केलेल्या दोन तज्ज्ञ संचालकांची निवड सहाय्यक निबंधक, सहकारी संस्था गंगापूर यांनी नियमबाह्य ठरवत ती रद्द करण्याचे आदेश दिले. याबाबत विरोधी गटाच्या सदस्यांनी तक्रार दाखल केल्याने त्यावर हा निर्णय घेण्यात आला आहे. त्यामुळे गंगापूर तालुका शिक्षक पतसंस्थेतील राजकारण पुन्हा एकदा समोर आले.
पतसंस्थेत काही महिन्यांपूर्वी अध्यक्षांनी तज्ज्ञ संचालक म्हणून शेख सत्तार शेख सरदार आणि अनिल वाकचौरे यांची निवड केली होती, पण संबंधित निवडप्रक्रिया नियमबाह्य असल्याची तक्रार संचालक राजेश हिवाळे, अंकुश जाधव, सतीश कबाडे, जालींदर चव्हाण, संजय भडके यांनी सहाय्यक निबंधक, सहकारी संस्था गंगापूर यांच्याकडे निवेदनाद्वारे केली होती. यावर सहाय्यक निबंधकांनी शहनिशा करत संबंधित निवड नियमबाह्य ठरवत ती रद्द करण्याचे आदेश पतसंस्थेच्या अध्यक्षांसह सचिवांना दोन महिन्यांपूर्वीच दिले होते. मात्र, याकडे संबंधितांनी चालढकल केल्याचे समोर आल्यानंतर त्यांनी पुन्हा संबंधित आदेशाचे स्मरण करून देत केलेली निवड रद्द करण्याचे कळविले. त्यामुळे अध्यक्षांनी संबंधित निवड नुकतीच रद्द केली आहे. तज्ज्ञ संचालक म्हणून निवड झालेल्या संचालकांची निवड नियमबाह्य असताना त्यांनी पतसंस्थेच्या मासिक बैठकीत हजेरी लावल्याचे पुढे येत आहे. यासह त्यांना बैठक भत्ता सुद्धा अदा करण्यात आला आहे. याबाबत सहाय्यक निबंधकांकडे तक्रार करण्याच्या दृष्टीने विरोधक पुढे येत आहेत.
---