औरंगाबाद : केंद्र सरकारच्या ‘स्ट्रीटस् फॉर पीपल’ या राष्ट्रीय स्तरावरील स्पर्धेचा दुसरा कार्यक्रम रविवारी क्रांतीचौक येथे पार पडला. कलाकारांनी आपल्या विविध कलाकृतींचे सादरीकरण करून उपस्थितांचे लक्ष वेधून घेतले. स्वयंसेवी संस्था, क्रीडा संघटना, रॉक बँड स्वयंसेवकांनी यात सहभाग नोंदवून वातावरण निर्मिती केली.
औरंगाबाद स्मार्ट सिटी डेव्हलपमेंट कॉपोर्रेशन लिमिटेड (एएससीडीसीएल) आणि औरंगाबाद महानगरपालिकेने राष्ट्रीय स्तरावरील ‘स्ट्रीटस् फॉर पीपल’ स्पर्धेत सहभाग नोंदवून औरंगाबादच्या रस्त्यांचा विकास करण्याचे नियोजन केले आहे. क्रांतीचौकात झालेल्या कार्यक्रमाचे उद्घाटन पोलीस आयुक्त निखिल गुप्ता, मनपा प्रशासक तथा एएससीडीसीएलचे मुख्य कार्यकारी अधिकारी आस्तिककुमार पाण्डेय, शालिनी गुप्ता यांच्या हस्ते झाले.
स्पर्धेच्या निमित्ताने क्रांतीचौक ते गोपाळ टी चौकापर्यंतचा रस्ता रहदारीमुक्त करण्यात आला होता. नितीन घोरपडे यांनी कार्यक्रमाची आखणी केली़ रोलर रिले स्केटिंग असोसिएशनचे भिकन आंबे यांच्या मार्गदर्शनाखाली स्केटिंग व सायकल स्टंटचे सादरीकरण विद्यार्थ्यांनी केले. गोल्डी चंद्रशेखर यांच्या चमूचा समावेश असलेल्या एनओबी बॅण्ड यांनी संगीत, तर सावित्रीबाई फुले महिला एकात्म समाज मंडळ व किशोरी विकास प्रकल्पाच्या चमूने रस्ते सुरक्षा, सेल्फ डिफेन्स, हुंडाबळी, व्यसनमुक्तीवर पथनाट्य सादर केले. सतीश दिवरे आणि माधुरी गावित यांचे मार्गदर्शन लाभले.
संजय पाटील यांच्या मार्गदर्शनाखाली चॅलेंज गेम, जिल्हा सायकल असोसिएशनचे चरणजितसिंह संघा यांच्या मार्गदर्शनाखाली सायकलिंग, अमित मगर यांच्या मार्गदर्शनाखाली मार्शल आर्टस्, जिल्हा तलवारबाजी संघटनेचे दिनेश वंजारे यांच्या मार्गदर्शनाखाली तलवारबाजी, मच्छिंद्र राठोड यांच्या मार्गदर्शनाखाली गदायुद्ध, शरद पवार यांच्या मार्गदर्शनाखाली जंप रोप, लता कालवार यांच्या मार्गदर्शनाखाली ताइक्वांदो, हिमांशू महाजन यांच्या मार्गदर्शनाखाली सेल्फ डिफेन्सचे सादरीकरण करण्यात आले. जिल्हा जलतरण संघटनेचे अभय देशमुख यांच्यासह क्रीडा संघटनांच्या प्रतिनिधींनी कार्यक्रमात सहभाग नोंदविला. औरंगाबादच्या ज्युनिअर चॅर्ली चॅप्लीन सोमनाथने आपल्या कलाकृतीद्वारे उपस्थितांचे लक्ष वेधले. २३ ते २५ डिसेंबरला कॅनॉट प्लेस परिसरात होणाऱ्या नियोजित ‘ओपन स्ट्रीटस्’मध्ये सहभाग नोंदविण्याचे नागरिकांना आवाहन केले.