फुलंब्री : औरंगाबाद येथून फुलंब्रीकडे येत असताना एका कारचे टायर फुटल्याने कार एका बाजूला ओढली गेली. कारने दोन दुचाकींना धडक दिल्याने एका महिलेसह तीन जण जखमी झाले आहेत. त्यांना उपचारासाठी रुग्णालयात दाखल करण्यात आले. या घटनेची नोंद फुलंब्री पोलीस ठाण्यात करण्यात आली.
औरंगाबाद-जळगाव महामार्गावरून उत्तम बाविस्कर (६२), त्यांची पत्नी सुनीता बाविस्कर (५५) हे दोघे दुचाकी(क्र. एमएच २० डीए २२४०)वरून फुलंब्रीकडे जात होते. तसेच रामदास अधाने (रा. विरमगाव, ता. खुलताबाद) हे दुचाकी(क्र. एमएच २० इडी ७६३५) वरून फुलंब्रीकडे निघाले होते. तेव्हा त्यांच्या पाठीमागून येणाऱ्या कारचे (एमएच २० बीए ५२३३) टायर फुटल्याने समोर असलेल्या दोन्ही दुचाकींना जोरदार धडक दिली. ही घटना चौका गावाजवळ घडली. या धडकेत तीन जण जखमी झाले. जखमीतील महिला गंभीर असल्याचे प्रथमदर्शनी नागरिकांनी सांगितले. कार चालक वसंत लक्ष्मण गोरडे (३४, बजरंग चौक, एन ८) याला फुलंब्री पोलिसांनी ताब्यात घेतले. त्याच्यावर गुन्हा दाखल करण्याची प्रक्रिया सुरू असल्याचे पोलीस निरीक्षक अशोक मुद्दीराज यांनी सांगितले.