औरंगाबाद : शहरात कोरोना रुग्णसंख्या झपाट्याने वाढत आहे. परिणामी, खासगी रुग्णालयांवर कोरोना रुग्णांचा भार वाढत आहे. बहुतांश खासगी रुग्णालयांतील खाटा फुल्ल झाल्या आहेत. अशा अवस्थेत तारेवरची कसरत करून रुग्णसेवा दिली जात आहे. मात्र, एकीकडे रोज नव्या रुग्णांची भर पडत आहे, तर दुसरीकडे पूर्वीपेक्षा क्षमता वाढवूनही कोरोना रुग्णांसाठी आणखी खाटा वाढविण्याचे आव्हान खासगी रुग्णालयांपुढे उभे राहिले आहे.
गतवर्षी कोरोनाचा प्रादुर्भाव सुरू झाला तेव्हा जेवढे खासगी रुग्णालय, खाटा उपलब्ध होत्या, त्यापेक्षा अधिक रुग्णालये सध्या कोरोना रुग्णांवर उपचार देत आहेत. खाटांची संख्याही वाढली आहे, तरीही रुग्णांपुढे खासगी रुग्णालयांच्या खाटा अपुऱ्या पडत आहेत. त्यामुळे खाटा वाढविण्याचे नियोजन रुग्णालयांकडून केले जात आहे; परंतु मनुष्यबळाच्या अडचणीला सामोरे जावे लागत आहे, शिवाय इतर आजारांची रुग्णसेवाही सुरळीत ठेवावी लागत आहे. अशा परिस्थितीत खासगी रुग्णालयांना खाटा वाढविण्यासाठी अडचणींना सामोरे जावे लागत आहे.
पूर्वीपेक्षा क्षमता वाढली; पण..
गतवर्षीच्या तुलनेत यावेळी खासगी रुग्णालयांवर अधिक भार आला आहे. त्यामुळे पूर्वीपेक्षा खासगी रुग्णालयांची क्षमता अधिक वाढली आहे. रुग्णांची संख्या दिवसेंदिवस वाढत आहे. त्यामुळे खासगी रुग्णालयांची जबाबदारी वाढली आहे; परंतु रुग्णसंख्येच्या तुलनेत आणखी खाटा वाढविण्यास अडचण येत आहे. जीवनदायी योजना, कॅशलेश, विमा या माध्यमातून खासगी रुग्णालयांत उपचार घेण्यासाठी येणाऱ्यांची संख्या अधिक आहे.
- डाॅ. हिमांशू गुप्ता, अध्यक्ष, मराठवाडा हाॅस्पिटल असोसिएशन
खासगी रुग्णालयांतील कोरोना रुग्णांची स्थिती (बुधवार सायंकाळपर्यंत)
रुग्णालय --- खाटांची क्षमता ---- दाखल रुग्ण
१) शंकर चेस्ट हाॅस्पिटल २० २०
२) गजानन हाॅस्पिटल ५० ४८
३) श्रद्धा हाॅस्पिटल २८ २७
४) लाइफ मल्टि हाॅस्पिटल ४३ ४३
५) आशिष हाॅस्पिटल ३५ ३५
६) लाइफलाइन हाॅस्पिटल ७५ ७०
७) धनवई हाॅस्पिटल २० २०
८) मेडिकव्हर हाॅस्पिटल ११२ १००
९) जे.जे. प्लस हाॅस्पिटल ५१ ५१
१०) कृष्णा हाॅस्पिटल ९१ ९१
११) अंजता हाॅस्पिटल ३० २८
१२) माणिक हाॅस्पिटल ८४ ८४
१३) एमआयटी हाॅस्पिटल ४४ ४३
१४) ओरिऑन सिटी केअर ४३ ४३
१५) अपेक्स हाॅस्पिटल ८० ७१
१६) एशियन हाॅस्पिटल ७५ ७३
१७) सिग्मा हाॅस्पिटल ९३ ९३
१८) बजाज हाॅस्पिटल १०३ १०३
१९) धूत हाॅस्पिटल १४० १४०
२०) सुमनांजली हाॅस्पिटल ३० २७
२१) वी केअर हाॅस्पिटल ४० ४०
२२) एमजीएम हाॅस्पिटल ५८७ ३८४
२३) एम्स हाॅस्पिटल ६२ ६२
२४) डाॅ. हेडगेवार रुग्णालय ९१ ९१