लोखंडी रॉडने महिलेस मारहाण
औरंंगाबाद : नातवासाठी पोषण आहार घेण्यास गेलेल्या बाबूलाल देहाडे यांना मज्जाव करून दोघाजणांनी लोखंडी रॉडने मारहाण केली. ही घटना १७ एप्रिल रोजी जटवाडा रोडवरील ओव्हरगावातील सुभाषनगर येथे घडली. याप्रकरणी बाबूलाल हरिभाऊ देहाडे (वय ५५, रा.सुभाषनगर, ओव्हरगाव, जटवाडा रोड) यांच्या तक्रारीवरून सांडू मुरलीधर शेजुळ व त्याच्या पत्नीविरुद्ध हर्सुल ठाण्यात गुन्हा दाखल करण्यात आला आहे.
भरधाव कंटेनरची पोलीस जीपला धडक
औरंंगाबाद : लिंक रोडवरून मुंबई हायवेकडे भरधाव वेगाने जाणाऱ्या कंटेनरने (एमएच ४०- एके- ६१५८) समोरून येणाऱ्या वाळूज ठाण्याच्या टू मोबाईल जीपला धडक दिली. हा अपघात १६ एप्रिल रोजी रात्री साडेअकराच्या सुमारास एएस क्लब चौकात घडला. या अपघातात टू मोबाईलच्या (एमएच २०- ईई- ६१८१) उजव्या बाजूचे मोठे नुकसान झाले. याप्रकरणी जमादार विजय बन्सी दारूंटे यांनी दिलेल्या तक्रारीवरून कंटेनरचालक पप्पू बेटू यादव (२४, रा. बिशुनपुरा, खड्डा, जि. कुशीनगर, उत्तर प्रदेश) याच्याविरुध्द एमआयडीसी वाळूज ठाण्यात गुन्हा दाखल करण्यात आला आहे.