जिल्हा परिषद शाळांचे ५ विद्यार्थी
जागतिक विक्रमात सहभागी
---
अवकाशात सोडले १०० उपग्रह : डॉ. ए.पी.जे. अब्दुल कलाम इंटरनॅशनल फाउण्डेशनचा उपक्रम
---
औरंगाबाद : अवकाशात १०० उपग्रह एकाच वेळी हेलियम बलूनद्वारे प्रक्षेपण करून विश्वविक्रम, आशिया विक्रम, भारतीय विक्रम, असिष्ट वर्ल्ड रेकॉर्ड स्थापित केला गेला. यात जिल्ह्यातून साई सुनील मनपुरे (शाळा बजाजगेट, वळदगाव), श्रद्धा चुंगडे (शाळा पेंडापूर), गौरव मोरे (शाळा पुरी), रोहित बागुल आणि ऋषिकेश सोनवणे (शाळा भादली, ता. वैजापूर) हे पाच विद्यार्थी या उपक्रमात सहभागी झाले. ते सर्व जिल्हा परिषद शाळेतील आहेत.
डॉ. एपीजे अब्दुल कलाम स्पेस रिसर्च पेलोड क्युब्ज चॅलेंज २०२१चा डॉक्टर एपीजे अब्दुल कलाम इंटरनॅशनल फाउण्डेशन स्पेस झोन इंडिया आणि मार्टिन ग्रुपतर्फे राबवलेल्या प्रकल्पांमध्ये रविवारी देशातील एक हजार विद्यार्थ्यांच्या हस्ते १०० उपग्रह एकाच वेळी अवकाशात सोडण्यात आले. या उपक्रमात महाराष्ट्रातील विद्यार्थ्यांनी ३९ उपग्रह बनवून हा जागतिक विक्रम नोंदवला आहे. हे प्रक्षेपण रामेश्वरम येथून करण्यात आले. विजयकुमार लिंबोरे, श्रीरंग औचरमल या शिक्षकांनी या विद्यार्थ्यांना रामेश्वरम येथे जाऊन उपक्रम यशस्वीतेसाठी परिश्रम घेतले.
जगातील सर्वात कमी वजनाचे म्हणजे २५ ग्रॅम ते ८० ग्रॅम वजनाचे हे उपग्रह भारतातील विद्यार्थ्यांनी यशस्वीरीत्या बनवून प्रक्षेपित केल्याने हे सर्व विक्रम प्रस्थापित झालेले आहे. राज्यातून ६५ विद्यार्थी आणि शिक्षकांनी प्रत्यक्ष हजर राहून हा विश्वविक्रमात सहभाग नोंदविला आहे. मुख्य कार्यकारी अधिकारी मंगेश गोंदावले व प्राथमिक विभागाचे शिक्षणाधिकारी सूरजप्रसाद जयस्वाल यांनी विद्यार्थी व शिक्षकाचे कौतुक केले.