विषाणू निदान : ॲण्टिजनपेक्षा आरटीपीसीआर तपासणीवर भर
---
औरंगाबाद : जिल्ह्यात २६ मार्चपर्यंत ६.८४ लाख जणांची कोरोना तपासणी झाली. गेल्या आठवडाभरात दररोज सरासरी सहा हजारांच्या वर रुग्णांचे स्वॅब तपासणीसाठी घेतले जात आहेत. औरंगाबादकरांच्या रोजच्या या चाचणीसाठी सुमारे ३० लाखांचा खर्च होत आहे.
कोरोनाचे स्वॅब सुरुवातीला तपासणीला पुणे येथे एनआयव्हीला पाठवले जात होते. त्यानंतर शहरात शासकीय वैद्यकीय महाविद्यालय आणि डाॅ. बाबासाहेब आंबेडकर मराठवाडा विद्यापीठात विषाणू निदान प्रयोगशाळा सुरू झाली. ॲण्टिजनचीही सुविधा झाली. जिल्ह्यात आतापर्यंत झालेल्या तपासण्यांत आरटीपीसीआरच्या तपासण्या चार लाखांपर्यंत झाल्या आहेत, तर अडीच लाखांच्या दरम्यान ॲण्टिजन तपासण्या झाल्या आहेत. त्यानुसार किमान २५ कोटींपेक्षा अधिक खर्च शासनाने केवळ तपासणीवर केला असण्याची शक्यता आहे, असे डॉ. गुलाब खेडकर म्हणाले.
शहरात खाजगी २ प्रयोगशाळाही सेवा देत होत्या. हजार ते १२०० रुपये ते तपासणी शुल्क आकारत होत्या. मात्र, त्यांच्या सेवा मनपाकडून गेल्या आठवड्यात बंद करण्यात आल्या. खाजगी लॅबलाही विचारणा केली असता कोरोना तपासणीला त्यांनी नकार दिला. त्यामुळे बहुतांश कोरोना तपासण्या दोन्ही शासकीय प्रयोगशाळांकडून होत आहेत.
---
शासकीय प्रयोगशाळांतील रोजच्या चाचण्यांची संख्या ४०००
खाजगी प्रयोगशाळेतील रोजच्या चाचण्यांची संख्या ३००
शासकीय प्रयोगशाळा २
खाजगी प्रयोगशाळा २
---
६०००
जिल्ह्यात दररोज केल्या जाणाऱ्या चाचण्या
--
४०,०००
चाचण्या झाल्या गत आठवड्यात
---
-जिल्ह्यात १९ ते २६ मार्चदरम्यान ४० हजार ७९८ आरटीपीसीआर सॅम्पल्स घेण्यात आले. त्यापैकी ११ हजार ५८१ रुग्ण बाधित आढळून आले.
-खाजगी लॅबमध्ये या काळात ३७०२ सॅम्पल तपासणीसाठी देण्यात आले. त्यातून १०१८ रुग्ण बाधित आढळून आले.
-आतापर्यंत खाजगी लॅबमध्ये २९ हजार ५२८ तर शासकीय प्रयोगशाळेसह ॲण्टिजनच्या माध्यमातून ६ लाख ५४ हजार ९९२ तपासण्या २६ मार्चपर्यंत करण्यात आल्या.
----
१ ०००
रुपये खर्च येतो एका चाचणीला
---
डाॅ. बाबासाहेब आंबेडकर मराठवाडा विद्यापीठातील प्रयोगशाळेचे प्रमुख डाॅ. गुलाब खेडकर म्हणाले, तपासणीसाठी लागणारे यंत्र, कन्झ्युमेबलसह मनुष्यबळ शासनच पुरवत असल्याने निश्चित एका तपासणीचा खर्च किती येतो हे सांगता येणे कठीण आहे. मात्र, वेगवेगळ्या तीन प्रक्रिया, त्यासाठी लागणाऱ्या कन्झ्युमेबलचा खर्च प्रतिचाचणी ५०० रुपयांच्या घरात जात असल्याचा अंदाज आहे. त्याशिवाय मनुष्यबळ, प्रयोगशाळा उभारणी खर्च, स्वॅब घेणारी यंत्रणा, त्या स्वॅबला लॅबपर्यंत पोहचवण्यासह रिपोर्ट पोहचवणे, काॅन्टॅक्ट ट्रेसिंगचा खर्च यापेक्षा वेगळा आहे. खाजगीत एका तपासणीला एक हजार रुपये मोजावे लागतात.