औरंगाबाद : दरवर्षी कोट्यवधींची उलाढाल करणारे उद्योजक, वडिलोपार्जित धनाढ्य व्यक्तींसह, नामांकित व्यक्तींना स्वसंरक्षणासाठी बंदूक, पिस्तूल बाळगण्याचा परवाना शासनाकडून दिला जातो. यासोबत सशस्त्र दलातून निवृत्त झालेले जवान, बँका, व्यावसायिक प्रतिष्ठानांना शस्त्र परवाना दिला जातो. पोलीस आयुक्तालयाच्या हद्दीत अशाप्रकारे १ हजार ३७६ जणांकडे शस्त्र परवाने आहेत. परवानाधारक व्यक्तीला शस्त्रपरवान्याची गरज आहे अथवा नाही, याचा विचार करून त्यांच्या परवान्याचे नूतनीकरण केले जाते.
औरंगाबाद शहर पोलीस आयुक्तालयाच्या हद्दीतील १७ पोलीस ठाण्यांतर्गत राहणाऱ्या व्यक्तींना शस्त्र परवाना देण्याचा शहरात पोलीस आयुक्तांना तर ग्रामीण भागात जिल्हाधिकारी यांना अधिकार आहे. पोलीस आयुक्तालयाच्या हद्दीतील १ हजार ३७६ नागरिकांकडे शस्त्र परवाने आहेत. दरवर्षी नियमित आयकर भरणारे, कोट्यवधींची उलाढाल असलेले व्यावसायिक, उद्योजक आणि गुन्हेगार, दहशतवाद्यांकडून ज्यांच्या जीविताला धोका आहेत, अशी व्यक्ती, राजकीय व्यक्तींना स्वत:च्या संरक्षणासाठी शस्त्र बाळगण्याचा परवाना दिला जातो. परवाना दिल्यानंतर विहित मुदतीत शस्त्र खरेदी करून याबाबतची नोंद परवान्यावर केल्यानंतरच शस्त्र बाळगण्याचा अधिकार मिळतो. शहरातील प्रतिष्ठीत, उद्योजक, व्यावसायिक आणि ज्यांच्या जीविताला धोका आहेत, अशा व्यक्तींसोबतच गनमॅन म्हणून नोकरी करण्यासाठी सैन्य दलातून निवृत्त झालेल्या जवानांना शस्त्र परवाना देण्यात आला आहे. यासोबतच बँकांनाही शस्त्र परवाने देण्यात आले आहेत. हे शस्त्र सुरक्षित राहील, याची खबरदारी परवानाधारक व्यक्तीला घ्यावी लागते. गतवर्षीपर्यंत दरवर्षी शस्त्र परवान्याचे नूतनीकरण करावे लागे. आता तीन वर्षानंतर परवान्याचे नूतनीकरण केले जाते.
----------------
चौकट
शस्त्र परवाना स्टेटस सिम्बॉल
शस्त्र परवाना असणे काही जण स्टेट्स सिम्बॉल म्हणून मानतात. आटोकाट प्रयत्न करून ते शस्त्र परवाना मिळवितात. एवढेच नव्हे तर ते कायम शस्त्र जवळ बाळगतात.
-------------------
शस्त्र परवाना कसा काढायचा
शस्त्र परवाना काढण्यासाठी पोलीस आयुक्त कार्यालय अथवा ग्रामीण भागातील नागरिकांनी पोलीस अधीक्षक कार्यालय येथे विहित नमुन्यातील अर्ज करावा लागतो. पाच रुपये कोर्ट फी स्टॅम्प या अर्जासाठी आवश्यक आहे. यासोबत तुम्हांला शस्त्र परवान्याची का गरज आहे, याविषयी स्पष्ट शब्दांत अर्ज आवश्यक असतो.
---------
शस्त्र परवान्यासाठी आवश्यक कागदपत्रे
शस्त्र परवान्यासाठी अर्जदारांकडे रेशनकार्ड, मतदार कार्ड, तो आयकरदाता असल्याचा आणि कर भरल्याच्या चलनाची कॉपी, शहरातील दोन प्रतिष्ठीत व्यक्तींकडून अर्जदार चारित्र्यवान व्यक्ती असल्याचे प्रमाणपत्र, शारीरिक दृष्ट्या तंदुरुस्त असल्याचे डॉक्टरांचे प्रमाणपत्र, शैक्षणिक पात्रता आणि शैक्षणिक कागदपत्रांच्या स्वत: साक्षांकित प्रती, वयाचा दाखला (जन्म प्रमाणपत्र, शाळा सोडल्याचा दाखला) आदी कागदपत्रांसह अर्जाची आवश्यकता असते. अर्ज प्राप्त झाल्यावर अर्जदाराला शस्त्राची गरज आहे अथवा नाही, याचा निर्णय घेऊन शस्त्र परवाना देण्याविषयी दोन महिन्यांत निर्णय घेतला जातो.
------------------