बल्लारपूर : चौघांनी एका इसमावर तलवारीने हल्ला करून त्याला जखमी केल्याची घटना येथील महाराणा प्रताप वॉर्डात शुक्रवारच्या रात्री सुमारे ९.३० वाजताच्या दरम्यान घडली.
जखमीचे नाव सचिन ऊर्फ बोग्गा सुरेश दवंडेवार (२७ ) रा. शिवाजी वाॅर्ड बीटीएस एरिया, बल्लारपूर असे आहे. तर अटक करण्यात आलेल्या आरोपीचे नाव विनोद ऊर्फ बंटी कोंडावार (२८) रा. दादाभाई नौरोजी वाॅर्ड, बल्लारपूर असे आहे. इतर तीन आरोपी फरार आहेत. महाराणा प्रताप वाॅर्डात काही जण हातात तलवार घेऊन फिरत असल्याची माहिती पोलिसांना मिळाली. पोलीस निरीक्षक उमेश पाटील, सहायक पोलीस निरीक्षक विकास गायकवाड व सहकाऱ्यांना घेऊन घटनास्थळी पोहोचल्यानंतर सचिन जखमी अवस्थेत दिसला. चौघांनी त्याच्यावर तलवारीने वार करून त्याला गंभीर जखमी केले होते. पोलिसांनी काही तासातच विनोद कोंडावार याला त्याच्या घरातून पकडले. घटनेतील त्याचे इतर तीन साथीदार फरार झाले आहेत. जुन्या वैमनस्यातून हा हल्ला झाल्याचे सांगण्यात येते. फरार तिघांचा शोध सुरू आहे. आरोपींविरुद्ध कलम ३०७ भादंवि अन्वये गुन्हा दाखल करण्यात आला असून, पुढील तपास पोलीस निरीक्षक विकास गायकवाड हे करीत आहेत.