त्या युवकाची हत्या बंदुकीच्या गोळीने नव्हे, तर चाकू भोसकल्याने

वरोरा शहरातील पंचायत समिती कार्यालयानजीक १५ मे रोजी सायंकाळच्या सुमारास एका टिनाच्या शेडखाली आबिद शेख हा बसला असताना दुचाकी वाहनाने आलेल्या देवा नोकरकर व गौरव वाळके या दोघांनी त्याच्यावर धारदार शस्त्राने हल्ला केला. त्यात तो गंभीर जखमी झाला. उपजिल्हा रुग्णालय वरोरा येथे नेले असता वैद्यकीय अधिकाऱ्यांनी त्याला मृत घोषित केले. घटनास्थळी एक बंदूक आढळून आली. मात्र आबिदच्या मृतदेहावर धारदार शस्त्राचे आठ घाव आढळून आले. यामुळेच त्याचा मृत्यू झाल्याचे प्राथमिक वैद्यकीय अहवालातून दिसून येत असल्याचे उपविभागीय अधिकारी डाॅ. नीलेश पांडे यांचे म्हणणे आहे. यावरून मारेकऱ्यांनी बंदुकीच्या गोळ्या झाडल्या वा नाही ही बाब अद्याप स्पष्ट झाली नाही. या प्रकरणी पोलिसांनी देवा नोकरकर व गौरव वाळके या दोन्ही आरोपींना काही तासांतच अटक केली. या दोघांनी आबिदची हत्या नेमकी कशासाठी केली, हे कारण अद्याप गुलदस्त्यात आहे. आरोपींना वरोरा न्यायालयाने एक दिवसाची पोलीस कोठडी ठोठावली. पुढील तपास सहायक पोलीस निरीक्षक राजकिरण मडावी करीत आहेत.