लोकमत न्यूज नेटवर्कचंद्रपूर : दिवसेंदिवस सिलिंडर दरवाढीच्या किमतीने सर्वसामान्यांचे बजेट बिघडले आहे. मागील महिन्यांत २५ रुपयांनी सिलिंडरची दरवाढ झाली असताना आता पुन्हा २५ रुपयांची वाढ झाली आहे. त्यामुळे सिलिंडरचे दर ९३३ रुपयांच्या जवळपास पोहोचले आहेत. त्यामुळे ग्रामीण भागात पुन्हा चुली पेटायला लागल्या आहेत. परंतु, हिच महागाईची झळ शहरातसुद्धा जाणवत असल्याने घर व फ्लॅटमध्येही चुली पेटवायच्या का? असा संतप्त सवाल गृहिणीकडून विचारल्या जात आहे. लॉकडाऊनमुळे सर्वसामान्य आर्थिक अडचणीत सापडले आहेत. अनेकजण बेरोजगार झाले आहेत. त्यातच महागाई दररोज वाढत आहे. घरगुती सिलिंडरच्या दरातही प्रत्येक महिन्यात वाढ होत आहे. सततची महागाई पाठ सोडत नसल्याने सर्वसामान्यांचे मोठे हाल होत आहेत. जानेवारी महिन्यात ७५० रुपयांच्या जवळपास असलेला सिलिंडर आता ९३३ रुपयांवर पोहोचला आहे.
सबसिडी किती मिळते हो भाऊ- घरामध्ये आता सिलिंडरचा वापर वाढला असून या वर्षात तब्बल २०० रुपयांच्या जवळपास दरवाढ झाली आहे. मात्र, सिलिंडरवर मिळणार सबसिडी दिवसेंदिवस कमी होत आहे. - यंदा जानेवारी महिन्यांपासून ग्राहकांना केवळ ५० रुपयांच्या जवळपास नाममात्र सबसिडी मिळत आहे. बऱ्याच ग्राहकांच्या खात्यात नियमित जमाही होत नसल्याची ओरड आहे.
व्यावसायिक सिलिंडरही महागघरगुती सिलिंडरसोबतच १९ किलो वजनाच्या व्यावसायिक सिलिंडरचीही मागणी मोठ्या प्रमाणात असते. त्यामुळे याही सिलिंडरच्या किंमतीमध्ये दिवसेंदिवस वाढ होत आहे. ऑगस्ट महिन्यांमध्ये १ हजार ७६५ रुपयांत मिळणार सिलिंडर आता १ हजार ८५० रुपयांवर पोहोचले आहे. त्यामुळे व्यावसायिक सिलिंडरसुद्धा परवडेनासे झाले आहेत.
महिन्याचे गणितच कोलमडलेपूर्वीच महागाई मोठ्या प्रमाणात वाढत आहे. त्यातच प्रत्येक महिन्यात सिलिंडरचे दर वाढत आहेत. त्यामुळे चूल पेटविल्याशिवाय पर्याय नाही. सततच्या महागाईने घर चालविणे मोठे जिकिरीचे झाले आहे.- प्रतीक्षा बेलसरे, गृहिणी
कोरोनामुळे उत्पन्नावर परिणाम पडला आहे. त्यातच महागाई पिच्छा सोडण्याचे नाव घेत नाही. त्यामुळे घरखर्च करताना मोठी अडचण होत आहे. सिलिंडरचे दर प्रत्येक महिन्याला वाढत असल्याने अडचण जात आहे.-पुजा राठोड, गृहिणी