चंद्रपूर : जिल्ह्यातील विविध कंपन्या, बँक, पतसंस्थांमध्ये झालेल्या अपहाराच्या २१ गुन्ह्यांचा येथील आर्थिक गुन्हे शाखेच्या माध्यमातून तपास सुरू आहे. यातील ६ प्रकरणांत दोषारोपपत्र दाखल करण्यात आले. उर्वरित गुन्ह्यांचा तपास सुरू असल्याने कोट्यवधी रुपयांचा अपहार करणारे व्हाइट कॉलर गुन्हेगार खुलेआम फिरत आहेत.
आकर्षक व्याजदार, दामदुप्पट असे आमिष दाखवून काही मल्टिनॅशनल कंपन्या, पतसंस्थांनी ग्राहकांना आपल्याकडे आकर्षित करून कोट्यवधींचा चुना लावून गाशा गुंडाळला. बहुतांश पतसंस्थांनीही गुंतवणूकदारांचे कोट्यवधी रुपये बुडविले आहेत. याबाबतचा तपास आर्थिक गुन्हे शाखा करीत असते. २०१९ मध्ये अशी सात प्रकरणे तर २०२० मध्ये १४ प्रकरणे आर्थिक गुन्हे शाखेकडे आली आहेत. त्यातील सहा प्रकरणांमध्ये दोषारोपत्र दाखल करण्यात आले आहे. उर्वरित प्रकरणांचा तपास सुरू आहे. मात्र गुंतवणूकदार व खातेदार आपले अडकलेले पैसे परत मिळतील या आशेने आर्थिक गुन्हे शाखेकडे चकरा मारत आहेत.
बॉक्स
या संस्थांमध्ये झाला अपहार
चंद्रपूर येथील कोल सिटी अर्बन को-ऑपरेटिव्ह क्रेडिट सोसायटी, मैत्रेय, गायकवाड समितीतर्फे आदिवासी योजनेतील विविध प्रकरणे, स्कॉलर लॅण्ड डेव्हलपर्स, रोज नागरी सहकारी पतसंस्था यासह जिल्ह्यातील अनेक पतसंस्था व संस्थेतील अपहाराचा तपास सुरू आहे.
बॉक्स
सीडीसीसी बँकेतील घोटाळा गाजला
येथील चंद्रपूर जिल्हा मध्यवर्ती सहकारी बँकेमधील अनुकंपा भरती प्रकरण तसेच साहित्य खरेदी प्रकरणाचा घोटाळा मोठ्या प्रमाणात गाजला. बँकेतील संचालकांनी या प्रकरणाची तक्रार केल्याने हे प्रकरण मोठ्या प्रमाणात चर्चेत होते.