वढोली : वढोली-गोंडपिपरी मार्ग खड्डेमय झाला असून, सहा किलोमीटरच्या प्रवासात एक, दोन नाही, तर तब्बल पन्नासहून अधिक खड्डे पडले आहेत. त्यामुळे जीव धोक्यात घालून नागरिकांना प्रवास करावा लागतो. बांधकाम विभागाचे अधिकारी झोपले आहेत काय, असा प्रश्न नागरिक विचारत आहे.
या मार्गावर नेहमीच वाहनांची वर्दळ असते. गोंडपिपरी ते खेडी रोडचे काम गेल्या दोन ते तीन वर्षांपासून कासवगतीने सुरू आहे. अनेक ठिकाणी एका बाजूला अर्धा भाग खोदकाम केल्यामुळे व रस्त्यावर गिट्टी पसरल्यामुळे मोठ्या प्रमाणात अपघात घडत आहे. रस्त्यावर मोठमोठे खड्डे असून, खड्ड्यांचे रूपांतर डबक्यात झाले आहे. हे खड्डे आहेत की डबके, असा प्रश्न नागरिकांना पडत आहे.
रस्त्यावर मोठमोठी गिट्टी पसरली असल्याने, दररोज या मार्गावर अपघात घडत असून, अनेकांना जीव गमवावा लागत आहे, तर काहींना अपंगत्व येत आहे. वारंवार खड्डे बुजविण्याची मागणी करूनही नागरिकांच्या मागणीकडे बांधकाम विभागाचे दुर्लक्ष होत आहे.
खडड्यांचा अंदाज येत नसल्याने अनेक वाहने खडड्यात फसतात. मागील दोन वर्षांपासून हा प्रकार वारंवार घडत असून, या मागणीकडे दुर्लक्ष करणाऱ्या अधिकाऱ्यांवर व खेडी-गोंडपिपरी रस्त्याचे काम करणाऱ्या कंत्राटदारावर कारवाई करावी, अशी मागणी नागरिक करीत आहे.
कोट
गोंडपिपरी-वढोली रस्त्यावर मोठ्या प्रमाणात गिट्टी पसरून आहे. दुचाकीसह चारचाकी वाहनही चालविताना मोठी कसरत करावी लागते. प्रवास सुरक्षित वाटत नाही. बांधकाम विभागाने लक्ष देऊन तातडीने खड्डे बुजवावेत.
- डॉ.नितेश पावडे, नागरिक, वढोली.