कोरपना : तालुक्यातील नारंडा येथील पशुवैद्यकीय रुग्णालयाची इमारत मंजूर झाली असून, याकरिता भारतीय जनता युवा मोर्चाचे जिल्हा उपाध्यक्ष आशिष ताजने यांनी जिल्हा परिषदेचे कृषी व पशुसंवर्धन सभापती सुनील उरकुडे यांच्याकडे मागणी केली होती.
नारंडा येथील पशुवैद्यकीय रुग्णालयाची इमारत अतिशय जीर्ण झाली होती. त्यामुळे या रुग्णालयात डॉक्टरांना काम करणे अवघड जात होते. तसेच पशुपालकांनासुद्धा रुग्णालयात अनेक गैरसोयींचा सामना करावा लागत होता. रुग्णालयाची इमारत ही अतिशय जुनी असल्यामुळे रुग्णालयात आधुनिक सोयी-सुविधांचा अभाव होता. या सर्व बाबींची दखल घेत भारतीय जनता युवा मोर्चाचे जिल्हा उपाध्यक्ष ताजने यांनी जिल्हा परिषदेचे कृषी व पशुसंवर्धन सभापती उरकुडे यांच्याकडे मागणी करून पाठपुरावा सुरू केला.
त्यांच्या मागणीची दखल घेत उरकुटे यांनी नारंडा येथील पशुवैद्यकीय रुग्णालयाच्या इमारतीकरिता ९८ लाख ८९ हजार रुपयांचा निधी मंजूर केला. नारंडा, लोणी, पिपरी, शेरज बु, शेरज खुर्द, वनसडी, सोनुर्ली गावांचा या रुग्णालयांतर्गत समावेश होतो. रुग्णालयाची इमारत मंजूर झाल्यामुळे येथील पशुपालकांना याचा लाभ होणार आहे.