चिमूर : तालुक्यात रोजगाराभिमुख उद्योगांचा अभाव आहे, तर दुसरीकडे बेरोजगारीचे प्रमाण दिवसेंदिवस वाढतच असल्याचे दिसून येते. उद्योगच नसल्याने युवकांमध्ये निराशा पसरत आहेत. शासनाने मुद्रा व अन्य योजनांची घोषणा करून स्वयंरोजगार उभारण्यावर भर देत आहेत. त्यामुळे काही युवक कर्जासाठी बँकांकडे अर्ज सादर करीत आहेत, पण प्रतिसाद मिळत नसल्याचा आरोप होत आहे.
भरधाव धावणाऱ्या वाहनांकडे दुर्लक्ष
चंद्रपूर: शहरातील अनेक मार्गावर वाहनचालक भरधाव वेगाने वाहने चालवितात. त्यामुळे शहरात अपघाताचे प्रमाण वाढले आहे. त्यामुळे भरधाव वेगाने वाहन चालविणाऱ्यांवर कारवाई करावी, अशी मागणी करण्यात आली आहे.
केरोसिन मिळत नसल्याने नागरिक त्रस्त
चंद्रपूर : शासनाने चूलमुक्त धोरण अवलंबित केरोसीन देणे बंद केले आहे. यासाठी लाभार्थ्यांना गॅस-सिलिंडरचे वितरणही केले आहे. मात्र, सध्याच्या स्थितीत नागरिकांकडे गॅस सिलिंडर भरणसाठी पैसाच नसल्यामुळे अनेक जण चुलीवरच स्वयंपाक करणे पसंत करीत आहे, तर काही जण केरोसिनची मागणी करीत आहेत. त्यामुळे ग्रामीण भागात केरोसिनचा पुरवठा करण्याची मागणी नागरिकांकडून केली जात आहे.
शिकवणी क्लास सुरू
करण्याची परवानगी द्या
चंद्रपूर : लॉकडाऊनमध्ये सर्वच बंद झाल्याने खासगी शिवकणी क्लासवरही निर्बंध आले. त्यानंतर अनलॉक करण्यात आले असून, काही निर्बंधही हटविण्यात आले. मात्र, शिकवणी वर्ग अद्यापही सुरू करण्यात आले नसल्याने संचालकांचे मोठे नुकसान होत आहे. त्यामुळे शिकवणी वर्ग सुरू करण्याची परवानगी द्यावी, अशी मागणी करण्यात आली आहे.
अतिवृष्टीची मदत मिळालीच नाही
मूल : शासनाने जाहीर केलेली अतिवृष्टीची मदत अद्यापही काही शेतकऱ्यांना मिळाली नसल्याने आर्थिक अडचणीला सामोर जावे लागत आहे. काही शेतकरी तहसील कार्यालयात चकरा मारत आहेत. मात्र, कोरोनाचे कामे असल्याचे सांगून वापस पाठविण्यात येत आहे.