चंद्रपूर : अकोला येथील डॉ. पंजाबराव देशमुख कृषी विद्यापीठाचा (पीकेव्ही) विस्तार फार मोठा आहे. त्यामुळे येत्या दोन-तीन वर्षांत या विद्यापीठाचे विभाजन करून सिंदेवाही येथे नवीन कृषी विद्यापीठ व वनविद्या महाविद्यालयात निर्माण करण्यास आपले प्राधान्य आहे. हा संपूर्ण परिसर वनांनी व्यापला असल्यामुळे येथे लवकरच वनविद्या महाविद्यालय सुरू करण्यात येईल. या दोन्ही बाबतींत राज्य शासन सकारात्मक असल्याची माहिती राज्याचे मदत व पुनर्वसन, आपत्ती व्यवस्थापन मंत्री तथा जिल्ह्याचे पालकमंत्री विजय वडेट्टीवार यांनी दिली.
स्व. वसंतराव नाईक जयंतीनिमित्त सिंदेवाही येथील कृषी विज्ञान केंद्रात शेतकऱ्यांशी संवाद साधताना ते बोलत होते. यावेळी जिल्हा परिषदेच्या समाजकल्याण सभापती नागराज गेडाम, जिल्हा परिषदेचे सदस्य रमाकांत लोधे, पंचायत समितीच्या सभापती मंदा बाळबुधे, उपसभापती शीला कन्नाके, मधुकर मडावी, कृषी विज्ञान केंद्राचे सहयोगी संशोधन संचालक डॉ. कोल्हे, कार्यक्रम समन्वयक डॉ. व्ही. जी. नागदेवते, शास्त्रज्ञ डॉ. स्नेहा वेलादी, डॉ. विजय सिडाम, प्रकाश देवतळे, आदी उपस्थित होते.
पालकमंत्री वडेट्टीवार म्हणाले, वसंतराव नाईक यांच्या काळात कृषी क्षेत्रात आधुनिक तंत्रज्ञानाची पायाभरणी झाली. त्यानंतर वसंतदादा पाटील व सुधाकरराव नाईक यांनी जलसंधारण, पाणी अडवा, पाणी जिरवा यांसारखे अभिनव उपक्रम राबविले. त्यामुळेच प्रगत शेतीमध्ये महाराष्ट्राचा देशात अव्वल क्रमांक आहे. विदर्भातील चंद्रपूर, गडचिरोली, भंडारा, गोंदिया आणि नागपूर जिल्ह्यांचा काही भाग अशा पाच जिल्ह्यांतून ६५ लाख टन धानाचे उत्पन्न होते. शेतकरी सुखी होण्याची ही वाटचाल असल्याचेही त्यांनी नमूद केले. डॉ. पंजाबराव देशमुख आणि वसंतराव नाईक यांच्या प्रतिमेला मालार्पण करून कार्यक्रमाची सुरुवात झाली. यावेळी कृषिभूषण पुरस्कारप्राप्त शेतकरी दिनेश शेंडे आणि गुरुदास मसराम पालकमंत्र्यांनी सत्कार केला. कार्यक्रमाला तालुका कृषी अधिकारी महाले, पंचायत समिती कृषी अधिकारी कांबळे, कृषी विज्ञान केंद्राचे कर्मचारी व शेतकरी उपस्थित होते.
बॉक्स
वनविद्या महाविद्यालयासाठी १८२ कोटींचा प्रस्ताव
सिंदेवाही येथील कृषी विज्ञान केंद्राच्या जागेवर वनविद्या महाविद्यालय स्थापन झाल्यास वनउपजांपासून शेतीला पूरक औषधी निर्माण होईल. या विषयावर वनविद्या महाविद्यालयात सखोल संशोधन केले जाईल. देशभरातील कृषी शास्त्रज्ञ येथे येण्यासाठी तयार आहेत. सिंदेवाही वनविद्या महाविद्यालय उभारण्यासाठी १८२ कोटींचा प्रस्ताव शासनाकडे पाठविण्यात आला, अशी माहितीही पालकमंत्री विजय वडेट्टीवार यांनी दिली.