अपक्ष म्हणून लढविली निवडणूक : अविरोध झाली सरपंच
चंद्रपूर : राज्यातील ग्रामपंचायत निवडणुका नुकत्याच पार पडल्या. आता सरपंचपदाची निवड प्रक्रिया सुरू झाली आहेत. ठिकठिकणी अनेक जण सरपंच होण्यासाठी दावे-प्रतिदावे करीत आहेत. अशातच वरोरा तालुक्यातील महाडोळी गटग्रामपंचायतमध्ये सर्वसाधारण आणि शेतकरी कुटुंबातील तरुणीची वयाच्या अवघ्या २१व्या वर्षी सरपंचपदी बिनविरोध वर्णी लागली, त्यामुळे गावातच नाही, तर परिसरात सर्वच तिचे कौतुक केले जात आहे. प्रतिभा शालीकराव मांडवकर(२१) असे सरपंच तरुणीचे नाव आहे. सर्वात कमी वयाच्या सदस्य म्हणून प्रतिभा मांडवकर ठरल्याचे बोलल्या जात आहे. त्या ओबीसी महिला प्रवर्गातून निवडून आल्या आणि आता त्यांच्या गळ्यात सरपंचपदाची माळ पडली आहे. गावाच्या विकासाठी काम करणार असून, शिक्षणही पूर्ण करणार असल्याचे मत ‘लोकमत’सोबत बोलताना व्यक्त केले.
--
बाॅक्स
प्रतिभा मांडवकर या मूळच्या शेगाव या गावच्या असून, त्यांचे आनंदनिकेतन महाविद्यालय, आनंदवन येथे बीएससी द्वितीय वर्षाला शिक्षण सुरू आहे, तसेच यशवंतराव चव्हाण मुक्त विद्यापीठातून बीए सुरू आहे.
कोणतीही राजकीय पार्श्वभूमी नसतानाही प्रतिभा मांडवकर या जिद्दीच्या भरवशावर अपक्ष उमेदवार म्हणून ग्रामपंचायत निवडणुकीत अर्ज केला होता. अपक्ष उमेदवार असतानाही त्यांनी पक्षांना, पॅनलला पराजीत करून विजयाची माळ आपल्या गळ्यात टाकली. एका सर्वसामान्य शेतकऱ्यांची मुलगी असलेल्या प्रतिभा यांची सरपंचपदी निवड झाली.
कोट
माझ्या मनात नेहमीच समाजासाठी काहीतरी चांगले करण्याची इच्छा होती. त्यामुळे मी या वर्षी निवडणुकीत अपक्ष म्हणून अर्ज भरला. निवडणुकीत सर्व मतदार बांधवांनी माझ्यावर विश्वास ठेवून मला निवडून दिले. आज माझी महाडोळी गट ग्रामपंचायतमध्ये सरपंचपदी निवड झाली. मी गावच्या विकासासाठी कटिबद्द असून, सर्वोतोपरी गावाचा विकास करणे हाच माझा हेतू आहे.
- प्रतिभा शालीकराव मांडवकर
सरपंच महाडोळी ग्रामपंचायत
सात सदस्य