नोंदणी केलेल्या सात हजार कापूस शेतकऱ्यांची पणन महासंघाकडे पाठ

हमीभावाने कापूस विक्रीकरिता दहा हजार ३१८ शेतकऱ्यांनी नोंदणी केली. त्यातील केवळ ३ हजार २५६ शेतकऱ्यांनी पणन महासंघाकडे ७४ हजार १२५ क्विंटल कापसाची विक्री केली. हमीभावाने कापूस विक्रीकरिता नोंदणी केलेल्या सात हजार ६२ शेतकऱ्यांनी अद्यापही कापूस विक्रीकरिता आणलाच नाही. बाजार समितीच्या वतीने सदर शेतकऱ्यांशी भ्रमणध्वनीवर वारंवार संपर्क साधला गेला. परंतु शेतकरी प्रतिसाद देत नसल्याचे दिसून आले. आता या शेतकऱ्यांचा शोध कसा घ्यावा, असा प्रश्न सध्या तरी अनुत्तरित आहे. खासगी जिनिंगमध्ये २२ हजार ८२३ शेतकऱ्यांनी दोन लाख ९३ हजार क्विंटल कापूस विकला आहे. खासगी जिनिंग व पणन महासंघाच्या दरामध्ये मध्यंतरी अधिक फरक नसल्याने अनेक शेतकऱ्यांनी जिनिंगमध्ये कापूस विकल्याचे मानले जात आहे. पणन महासंघाकडे नोंदणी केलेल्या शेतकऱ्यांनी कमी प्रमाणात कापूस विकल्याचे दिसून येत आहे. नोंदणी केलेल्या शेतकऱ्यांनी १५ फेब्रुवारीपूर्वी स्वामी जिनिंग माडा रोड येथे कापूस विक्रीस आणावा, असे आवाहन कृषी उत्पन्न बाजार समितीचे सभापती राजेंद्र चिकटे यांनी केले होते.