बाबुराव परसावार - सिंदेवाही
सिंदेवाही तालुका समृद्ध वनवैभवांनी नटलेला आहे. याच तालुक्यात सिंधबोडी तलाव आहे. तलावाच्या सभोवताल घनदाट जंगल आहे. नानाविध वन्यप्राणी व पक्षी या तलावात येतात. विदेशी पक्षीही या ठिकाणी अनेकदा येऊन जातात.अगदी ताडोबासारखे हे ठिकाण असतानाही वनविभागाने कधी सिंंधबोडी तलावाचा परिसर पर्यटन क्षेत्र म्हणून विकसित करण्याचे सौजन्य दाखविले नाही. त्यामुळे त्याचा पर्यटन विकास आराखडा तयार झाला नाही. हे ठिकाण उपेक्षितच राहिले. पर्यटन क्षेत्र म्हणून या तलावाला दर्जा देण्याची गरज सध्या वन्यप्रेमींकडून व्यक्त केली जात आहे. सिंदेवाही वनपरिक्षेत्रातील कचेपार जंगलातील कक्ष क्रमांक १३५(अ) मध्ये सिंधबोडी तलावाचा परिसर हे एक रमणीय स्थळ आहे. सिंदेवाहीपासून १० किलोमीटर अंतरावर कचेपार गाव घनदाट जंगलात आहे. कचेपारपासून पुर्वेस पाच कि.मी. अंतरावर सिंधबोडी तलाव आहे. हे ठिकाण जंगलाच्या मध्यभागी असून याला लागून खैरी व पवनपार तलाव आहेत. त्यामुळे सिंधबोडी तलावात भरपूर पाण्याचा साठा उपलब्ध आहे. तसेच तलावाला लागून डोंगर असल्यामुळे या ठिकाणी वन्यप्राण्यांना राहण्यासाठी नैसर्गिक वातावरण निर्माण झाले आहे. या तलावाच्या परिसरात मुक्तपणे हिंडणारे पशुपक्षी व वनराई पाहून मन प्रसन्न होते. तलावाच्या सानिध्यात वनराईने नटलेला व विस्तारलेला हा परिसर आहे. येथे मोठ्या संख्येने तृणभक्षी, मासभक्षी, वन्यप्राण्याशिवाय सरपटणारे प्राणी, औषधोपयोगी वनस्पती व प्रचंड वृक्ष यांची समृद्धता आहे. या परिसरात रानगवे, हरिण, सांबर, चितळ, भेडकी आदी तृणभक्षी प्राणी यांचा वावर आहे.या जंगलात साग, एन, बिजा,मोह, सालई, धावडा, किन्ही, पळस, आंजन, आवळा, हिरडा, बेहडा, चारोळी व इतर फळझाडाचा समावेश आहे.या तलावात परदेशी पाहुणे लाल तोंडाचा करकोचा, पांढरा बगडा, बारडी, पानकवडी, आस्ट्रेलियन पक्षी व इतर विविध प्रकारचे पक्षी पाण्यात विहार करताना आढळून येतात. तसेच हरिण, सांबर, चितळ, चौरसिंग, भेडकी, माकड, रानगवे, रानडुक्कर, ससा, आस्वल याचे कळप याशिवाय मोर, लांडोर, लावे, तितीर यांचा आवाज नेहमीच येत राहतो. लांब पिसारा असलेले मोर मनसोक्त फिरताना आढळून येतात. तसेच सायंकाळी पट्टेदार वाघ, बिबट, तडस, रानमांजर, रानकुत्रे व कोल्हा शिकारीच्या शोधात जंगलात भटकत असतात. या परिसरात वनविभागाच्या कर्मचार्यांनी पक्षासाठी खाद्य म्हणून ‘देवधान’ या भात पिकाची लागवड केली आहे. त्यामुळे येथे विविध प्रकारचे पक्षी पाहावयास मिळतात. या तलावावर सर्व प्रकारचे वन्यप्राणी पाणी पिण्याकरिता येतात. या ठिकाणी २४ तास वनकर्मचारी राहत असल्याने व ठिकठिकाणी कॅमेरा लावल्याने अवैध शिकारीवर प्रतिबंध झालेला आहे. इको टुरिझम व जंगल सफारीसारखे पर्यटकांना आकर्षित करणारे विविध उपक्रम राबविल्यास हे ठिकाण जंगल पर्यटन क्षेत्र म्हणून विकसित होऊ शकते. परंतु तसा प्रयत्नच आजवर करण्यात आलेला नाही. या क्षेत्राला उपेक्षितच ठेवण्यात आले आहे.