पहिल्याच मासिक सभेत जमाखर्च नामंजूर

:

पोलीस स्टेशनमार्फत गुन्हे शाखेला दिली तक्रार

मासळ बु. :

स्थानिक मासळ ग्रामपंचायतीमध्ये नव्यानेच निवडून आलेल्या सर्व सदस्यांची पहिली मासिक सभा आर्थिक व्यवहार तपासणे व जमा खर्च मंजूर करणे या विषयावर झाली; परंतु ग्रामसेवक प्रशांत लामगे यांनी जमाखर्च दाखविला नाही व विचारलेल्या प्रश्नाची उडवाउडवीची उत्तरे दिली. त्यामुळे पहिल्याच मासिक सभेत जमाखर्च नामंजूर करून आर्थिक गुन्हे शाखा चंद्रपूरद्वारे चौकशी करण्याचा ठराव मंजूर करण्यात आला.

त्यामुळे ग्रामपंचायतीमध्ये लाखो रुपयांचा गैरव्यवहार झाल्याचा आरोप सरपंचासह सदस्यांनी केल्याने गावात खळबळ उडाली आहे.

परंतु ठरावाची प्रत न देता ग्रामसेवक सभेमधून पळून गेले. तेव्हा २८ मार्चला पोलीस स्टेशन चिमूरमार्फत पोलीस अधीक्षक आर्थिक गुन्हे शाखा चंद्रपूर यांना सरपंच, उपसरपंच व सर्व सदस्यांनी तक्रार दाखल केली आहे.

चिमूर पंचायत समितींतर्गत येत असलेल्या ग्रामपंचायत मासळ येथे नवनियुक्त सरपंच, उपसरपंच आणि सर्व सदस्य यांची २६ मार्चला पहिली मासिक सभा आर्थिक व्यवहार तपासणे व जमा खर्च तपासणे या विषयावर झाली. यात ग्रामसेवकाला हिशोब मागितला असता त्यांनी उडवाउडवीची उत्तरे देत सभेतून पळ काढला. यात गृह कर, पाणीकर, सामान्य पावती कर आणि 14 वा वित्त आयोग याचा किती निधी प्राप्त झाला व खर्च किती, याचा हिशोब पाहिला असता यामध्ये भ्रष्टाचार झाल्याचे उघड झाले.

बॉक्स

या खर्चाचा तपशीलच नाही

सन २०१९-२० या आर्थिक वर्षात गृहकर पाच लाख ४० हजार ८५८ रुपये, पाणी कर एक लाख ५९ हजार ८१८ रुपये, दुकान गाळे किराया एक लाख २५ हजार आणि १४ वा वित्त आयोग चार लाख ४० हजार २५६ रुपये एवढा आहे; परंतु सदर खर्चाचे तपशील ग्रा.पं. कमिटीला दिले नाही. सदर रकम जमा न करता परस्पर खर्च केली आहे, असे निदर्शनास आले. त्यामुळे या आर्थिक व्यवहाराची चौकशी करून गैरव्यवहार व भ्रष्टाचार करणाऱ्यांवर कायदेशीर कारवाई करावी, अशी ग्रा.पं. मासळच्या संपूर्ण कमिटीने केली आहे. सदर प्रकरण माहितीसाठी मुख्य कार्यकारी अधिकारी यांना सादर केले आहे.