चंद्रपूर : जिल्ह्यात मोठ्या प्रमाणात कोरोना विषाणूच्या प्रादुर्भाव वाढत असून, मृत्यूंच्या संख्येतही वाढ होत आहे. या विषाणूपासून बचावाकरिता लस हा एकमात्र पर्याय आहे. वरोरा-भद्रावती विधानसभेतील ग्रामीण भागातील लोकांना लस घेण्यासाठी तालुक्याच्या ठिकाणी जावे लागते. त्यामुळे वरोरा तालुक्यातील चार आरोग्य केंद्र, २८ उपकेंद्र, भद्रावती तालुक्यातील पाच आरोग्य केंद्र व २४ उपकेंद्रात लस उपलब्ध करण्याची मागणी लोकहितकारी आमदार प्रतिभा धानोरकर यांनी केली आहे. या केंद्रांवर लस उपलब्ध झाल्यास मोठ्या प्रमाणात ग्रामीण भागातील लोकांची होणारी गैरसोय दूर होणार आहे.
वरोरा उपजिल्हा रुग्णालयात लस देण्यात येते. परंतु, ग्रामीण भागात लस उपलब्ध नसल्यामुळे सर्वांना उपजिल्हा रुग्णालय, वरोरा येथेच यावे लागते. त्यामुळे ग्रामीण भागातील लोकांचा पैसा व वेळेचा अपव्यय होतो. यासाठी आरोग्य केंद्र व उपकेंद्रात लस उपलब्ध करणे गरजेचे आहे. पहिल्या लाटेच्या तुलनेत दुसऱ्या लाटेत मोठ्या प्रमाणात मृत्यूदर वाढत आहे. ही चिंतेची बाब असून, यासाठी योग्य नियोजन करणे गरजेचे आहे. खासगी रुग्णालयाची यंत्रसामुग्री घेऊन खासगी डॉक्टरांची सेवा घ्यावी, त्यामुळे वाढत्या कोरोना रुग्णांवर उपचार करणे सोईचे होणार आहे. कोरोनाच्या दुसऱ्या लाटेचे थैमान थांबविण्यासाठी योग्य नियोजन करून टीम वर्क करून रुग्णांची व स्वतःची काळजी घ्यावी, असे आवाहन आमदार प्रतिभा धानोरकर यांनी केले आहे.