शंकरपूर : पुनेम गोंडी धर्माची स्थापना मुठवापोय पहांदी पारी कुपार लिंगो यांनी केली. अनादी काळापासून या धर्माचे, पुनेमचे पालन गोंड जमातीचे गण, सर्व गोंड लोक पालन करीत आहेत. गोंडी धर्म निसर्गाच्या व विज्ञानाच्या तत्त्वाशी जुळलेला आहे. आपली अनोखी परंपरा, नृत्य, सभ्यता, रिवाज जिवंत ठेवण्याकरिता शासनाने दिलेल्या जनगणनेतील धर्माच्या रकान्यामध्ये ‘गोंडीधर्म’ अशी नोंद करावी, असे आवाहन जागतिक गोंड सगा मांदीचे व गोंड समाजाचे अभ्यासक, वक्ते मनोजसिंह गोंड मडावी यांनी केले आहे.
चिमूर तालुक्यातील मदनापूर येथे जागतिक गोंड सगा मांदी शाखेच्या वतीने सल्लां गांगरा प्रतिकृतीचे उद्घाटन व गोंडी कोया पुनेम संमेलनाचे उद्घाटक व मार्गदर्शक म्हणून ते बोलत होते. ध्वजारोहण कार्यक्रमाचे अध्यक्ष परशुराम आत्राम यांचे हस्ते झाले. व्यासपीठावर ब्रह्मपुरीच्या नगरसेविका अर्चना खंडाते, खिरदास चिकराम, प्रा. विजयकुमार खंडाते, जामनीचे उपसरपंच नानाजी उईके, लक्ष्मण गोंड मडावी, दीपक गोंड कुमरे, छत्रपाल मसराम इंदरशहा मडावी, गजानन कंगाले, शेखर आत्राम, कोलाराचे सरपंच शोभा कोयचाडे, सुनीता सिडाम, आशा आत्राम उपस्थित होते.
गोंडी धर्माचे समाज बांधव, गोंडी ज्या भागात ज्या प्रदेशात वास्तव्यास आहेत. त्या भागातील लोक गोंडी धर्म, पुनेम, सभ्यता, रिवाज, परंपरा, नृत्य, खान पान मोठ्या आदराने आणि अभिमानाने मानतात पाळतात. त्या भागातील जल, जंगल, जमीन, परंपरा अजूनही सुरक्षित आहेत, असे मार्गदर्शनही यावेळी मनोजसिंह गोंड मडावी यांनी केले.
प्रास्ताविक प्रदीप घोडाम, संचालन दिलीपसिंह गोंड, आभार प्रदर्शन कुळमेथे यांनी केले. कार्यक्रमाकरिता सूरज वेटे, वैशाली कुळमेथे, बेबी आत्राम, कैलास कुळमेथे, हिवराज सिडाम, माधुरी कंगाले यांनी सहकार्य केले.