चंद्रपूर : थेट गावात जाऊन वीजयंत्रणेच्या देखभाल व दुरुस्तीच्या कामांसह वीजबिल दुरुस्ती, नवीन वीजजोडणी या त्रिसूत्री मोहिमेतील ‘एक गाव-एक दिवस’ हा उपक्रम महावितरणने हातात घेतला आहे. या उपक्रमाला बल्लारपूर विभागांतर्गत वरुड रोड येथून सुरुवात करण्यात आली. यावेळी ११३ दुरुस्तीची कामे, १ कृषिपंप जोडणी व ४३ तक्रारींचा निपटारा करण्यात आला. यावेळी कृषी धोरण २०२० बाबत माहिती व वीजबिलाची थकबाकी वसुलीसंदर्भात ग्रामपंचायतींचा सहभाग यावरही मार्गदर्शन करण्यात आले. याप्रसंगी आमदार संजय धोटे, चंद्रपूर परिमंडळाचे मुख्य अभियंता सुनील देशपांडे यांनी स्वतः ग्राहकांच्या तक्रारी समजून घेतल्या. चंद्रपूर परिमंडल कार्यक्षेत्रात येणाऱ्या चंद्रपूर आणि गडचिरोली जिल्ह्यात ही मोहीम राबविण्यात येत आहे. मागील वर्षी या मोहिमेंतर्गत जिल्ह्यात ६८ गावांमध्ये एकत्रित ९६८ तक्रारींचे निवारण करण्यात आले होते. महावितरणचे नागपूर परिक्षेत्राचे प्रभारी प्रादेशिक संचालक सुहास रंगारी यांच्या मार्गदर्शनाखाली ही मोहीम येत्या काळात अधिक गतिशील करण्यात येणार असल्याची माहिती, चंद्रपूर परिमंडळाचे मुख्य अभियंता सुनील देशपांडे यांनी दिली. ग्रामीण भागात सुरळीत वीजपुरवठ्यासाठी जिल्ह्यातील १५ तालुक्यांतील काही गावांत ‘एक गाव - एक दिवस’ हा उपक्रम सुरू करण्यात आला आहे. या मोहिमेत गावकऱ्यांशी महावितरणचे वरिष्ठ अधिकारी थेट संवाद साधून मोबाइल ॲप, वीजसुरक्षा व ग्राहकसेवेबाबतच प्रबोधन करणार आहे. या उपक्रमासाठी मुख्य अभियंता सुनील देशपांडे, अधीक्षक अभियंत्या संध्या चिवंडे, सर्व कार्यकारी अभियंता, उपकार्यकारी अभियंता व कनिष्ठ अभियंता प्रयत्न करीत आहेत.
बॉक्स
ही कामे होणार
महावितरणकडून करण्यात येणाऱ्या कामामध्ये तारांमधील झोल काढणे, स्पेसर्स बसविणे, वीजपुरवठ्याला अडथळे ठरणाऱ्या झाडाच्या फांद्या तोडणे, पीन व डिस्क इन्सुलेटर बदलणे, वितरण रोहित्रांना अर्थिंग करणे, डिस्ट्रिब्युशन बॉक्सची स्वच्छता व आवश्यक दुरुस्ती, किटकॅट बदलणे, गांजलेले वीजखांब बदलणे, वाकलेले वीजखांब सरळ करणे, नादुरुस्त व धोकादायक सव्हिर्स वायर बदलणे, सदोष व नादुरुस्त वीजमीटर बदलणे, वीजबिलांची दुरुस्ती, वीजमीटरची तपासणी, नावात बदल, वीज देयके मिळत नसल्यास ते उपलब्ध करून देणे, मीटर घराबाहेर काढणे अशा प्रकारची कामे करण्यात येणार आहेत.