स्पर्धा परीक्षेचे वर्ग घेण्याची मागणी
चंद्रपूर : लॉकडाऊन कालावधीत बार्टीतर्फे ऑनलाईन स्पर्धा परीक्षेचे मार्गदर्शन शिबिर राबविण्यात आले. कोरोनामुळे अनेक युवक आपल्या गावी गेले आहेत. आर्थिक अडचणींमुळे त्यांना पुन्हा शहरात येणे अडचणींचे ठरत आहे. त्यामुळे समाजकल्याण विभागातर्फे स्पर्धा परीक्षेचे वर्ग पुन्हा ऑनलाईन पद्धतीने घ्यावे, अशी मागणी विद्यार्थ्यांकडून होत आहे.
बँक ऑफ इंडियासमोर पार्किंगला अडचण
चंद्रपूर : येथील डॉ. बाबासाहेब आंबेडकर यांच्या पुतळ्याजवळील बँक ऑफ इंडियाच्या शाखेजवळ पार्किंगसाठी जागा उपलब्ध नसल्याने खातेदार रस्त्यावर वाहने ठेवतात. त्यामुळे अनेकदा वाहतुकीला अडचण येते, तर बहुतेकदा वाहतूक विभागाचे पथक रस्त्यावरून वाहने जप्त करीत असते. त्यामुळे विनाकारण दंड बसत असतो.
औषधसाठा उपलब्ध करण्याची मागणी
चंद्रपूर : शासनाने सुरू केलेल्या जनरीक औषधालयामध्ये अल्प आजारावरील औषधसाठा उपलब्ध आहे. परिणामी अनेक रुग्णांना खासगी मेडिकल स्टोअर्समधून औषधांची खरेदी करावी लागते. परिणामी त्यांना अतिरिक्त भुर्दंड बसत आहे. त्यामुळे शासनाने औषधसाठा उपलब्ध करावा, अशी मागणी आहे.