बल्लारपूर : बल्लारशाह रेल्वे स्थानक व रेल्वे क्वाॅर्टरच्या मध्ये सायकल स्टॅन्डजवळ जमा असलेल्या कचऱ्याला अचानक आग लागली. यामुळे एकच तारांबळ उडाली. नगरपरिषदेच्या अग्निशमन दलाने येऊन भडकलेली आग विझवली आणि वसाहतीच्या लोकांनी सुटकेचा नि:श्वास घेतला. ही घटना बुधवारच्या सकाळी ८ वाजता घडली.
सध्या उन्हाळ्याच्या दिवसात कचरा जमा करून तो पेटविण्यात येत आहे. बल्लारशाह रेल्वे स्थानकाच्या मागेही सायकल स्टॅन्डला लागून असलेला कचरा कोणीतरी पेटविला व तो भडकला. त्यामुळे तारांबळ उडाली. लोकांनी नगरपरिषदेच्या अग्निशमन दलास फोन करून बोलावले व आग विझविण्यात आली. जर आग भडकली असती तर जवळच असलेल्या रेल्वे वसाहतीची फार मोठी हानी झाली असती; परंतु कचऱ्याला आग कोणी लावली याची साधी चौकशीही रेल्वेच्या अधिकाऱ्यांनी केली नाही.