चंद्रपूर : भारतीय घटनेचे शिल्पकार डॉ. बाबासाहेब आंबेडकर यांची १२५ वी जयंती महोत्सव साजरी करण्यासाठी शहरातील बौद्ध मंडळे, सामाजिक संघटनांच्या माध्यमातून स्थापन करण्यात आलेल्या डॉ. बाबासाहेब आंबेडकर शतकोत्तर जयंती महोत्सव समितीच्या अध्यक्षपदी नगरसेवक स्नेहल रामटेके हेच कायम राहणार असल्याचा एकमुखी ठराव सिद्धार्थ हायस्कूल, घुटकाळा वॉर्ड चंद्रपूर येथे पार पडलेल्या समाजाच्या आमसभेत पारित करण्यात आला.
नगरसेवक स्नेहल रामटेके यांची २०१९ मध्ये आमसभेच्या माध्यमातून तीन वर्षांसाठी निवड करण्यात आली होती. त्यांच्या अध्यक्षतेखाली शतकोत्तर समितीचे विविध कार्यक्रम उत्साहात पार पडले. मात्र, कोरोनाच्या प्रादुर्भावामुळे मागील वर्षीचा जयंती कार्यक्रम घेता आला नाही. तरी समाजाच्या विविध घटकांशी सल्ला मसलत करून डॉ. बाबासाहेब आंबेडकर यांच्या पुतळा परिसरातील संरक्षण भिंतीचे बांधकामानिमित्त समाजातील घटकांना घेऊन मनपा आयुक्त यांच्याशी बैठका घेत असताना शतकोत्तर समितीच्या कार्यकारी मंडळाने स्नेहल रामटेके यांच्यावर अकार्यक्षमतेचा ठपका ठेवून त्यांच्यावर अविश्वास घडवून आणला होता. तो अविश्वास असंवैधानिक असल्याचे ठरवून आमसभेतून निवड करण्यात आलेल्या पदाधिकाऱ्याला आमसभेच्याच माध्यमातून पदमुक्त करण्याचा अधिकार आमसभेलाच असल्याने कार्यकारी मंडळाने घेतलेल्या निर्णयाचा निषेध करीत आमसभेने स्नेहल रामटेके यांना पदसिद्ध अध्यक्ष म्हणून कायम करण्यात आले. संचालन व प्रास्ताविक जितेंद्र डोहणे यांनी केले.
यावेळी आंबेडकरवादी नेते खुशाल तेलंग, कोमल खोब्रागडे, दादाराव उंदीरवाडे, रामसिंग सोहेल, एन. डी. पिंपळे, नेताजी भरणे, सुरेश नारनवरे, भन्ते कृपाशरण, सिद्धार्थ वाघमारे, देशक खोब्रागडे, तथागत पेटकर यांच्यासह अनेकांची उपस्थिती होती.