बल्लारपूरच्या उपविभागीय अधिकाऱ्याच्या विरोधात जिल्हाभरात आंदोलन

गोंडपिपरी येथील महसूल विभागातील कर्मचारी सुनील चांदेकर यांनी अंशत: कामातून सूट मिळण्याची विनंती केली असता, उपविभागीय अधिकारी डव्हळे यांनी तहसीलदारांना चांदेकर यांच्यावर फौजदारी गुन्हा दाखल करण्याचे पत्र तयार करण्यास सांगितले. यामुळे महसूल कर्मचाऱ्यांनी चांदेकर यांच्यावरील अन्यायाविरोधात जिल्हाभरात निदर्शने करून उपविभागीय अधिकाऱ्यांना निलंबित करण्याची मागणी केली. नागपूर जिल्हा महसूल तृतीय श्रेणी कर्मचारी संघटनेद्वारा नागपूर विभागीय आयुक्तांना संघटनेचे अध्यक्ष देवेंद्र शिंदोडकर, सरचिटणीस राजेंद्र ढोमणे, कोषाध्यक्ष अभिषेक हिवसे यांनी निवेदन देऊन उपविभागीय अधिकाऱ्यास निलंबित करण्याची मागणी केली. तर महसूल कर्मचारी संघटना जिल्हा वर्धाच्या वतीने संघटनेचे अध्यक्ष संजय मानेकर, कार्याध्यक्ष किशोर शेंडे, सरचिटणीस अजय धर्माधिकारी यांनी वर्धा जिल्हाधिकाऱ्यांना निवेदन देत आंदोलनास पाठिंबा दिला. विदर्भातून आंदोलनास पाठिंबा असल्याचे पत्र मिळत असल्याचे जिल्हा महसूल कर्मचारी संघटनाचे उपाध्यक्ष अजय मेकलवार, तालुका अध्यक्ष चंदू आगलावे यांनी सांगितले.