नागभीड (चंद्रपूर) : चंद्रपूर जिल्ह्याचे पालकमंत्री विजय वडेट्टीवार यांची कन्या शिवानी वडेट्टीवार यांनी चिमूर विधानसभा क्षेत्रात जनसंपर्क वाढविला आहे. यामुळे चिमूरचे काँग्रेस नेते डाॅ. सतीश वारजूकर कमालीचे विचलित झाले असून ते राष्ट्रवादी काँग्रेसच्या वाटेवर असल्याची माहिती आहे. राष्ट्रवादी काँग्रेसचे राष्ट्रीय अध्यक्ष शरद पवार यांनी डाॅ. वारजूकर यांना चर्चेसाठी ‘आमंत्रण’ दिले असल्याचीही माहिती आहे. या बाबीला डाॅ. वारजूकर यांनी दुजोरा दिला नसला तरी स्पष्ट शब्दात नकारही दिला नाही.
राष्ट्रवादी काँग्रेसच्या स्थापनेला आता २० वर्षांचा कालावधी होत असला तरी चिमूर आणि ब्रह्मपुरी विधानसभा या दोन्ही क्षेत्रात राष्ट्रवादी काँग्रेस बाल्यावस्थेतच आहे. याची जाणीव राष्ट्रवादी काँग्रेसच्या नेतृत्वाला आहे. ही उणीव भरून काढण्यासाठी राष्ट्रवादी काँग्रेस प्रयत्नशील आहे. म्हणूनच प्रदेशाध्यक्ष जयंत पाटील यांना राष्ट्रवादी काँग्रेसने या दोन्ही क्षेत्रात चाचपणी करण्यासाठी मागील महिन्यात पाठवले होते.
या चाचपणीचाच एक भाग म्हणून पाटील यांनी या दोन्ही विधानसभा क्षेत्राचा दौरा केला होता. जयंत पाटील यांनी मागील वेळेस चिमूर विधानसभा क्षेत्रातून फार थोड्या मताने पराभूत झालेल्या डाॅ. सतीश वारजूकर यांचीही भेट घेतली होती. ही भेट राजकीय क्षेत्रात चांगलीच चर्चेचा विषय ठरली होती.
दरम्यानच्या काळात शिवानी वडेट्टीवार यांनीही या क्षेत्रात जनसंपर्क वाढविला आहे. चिमूर विधानसभा क्षेत्रात नवनवीन राजकीय समीकरणे उदयास येत असल्याने डाॅ. वारजूकर चांगलेच विचलित झाले असल्याचे समजते. याची माहिती राष्ट्रवादीच्या नेतृत्वाला आहे. पाटील नागभीड येथे आले असताना वारजूकर यांना स्वतःच्या गाडीत बसवून चंद्रपूरपर्यंत घेऊन गेले होते. एवढेच नाही, तर दुसऱ्या दिवशी रात्री शंकरपूर येथे वारजूकरांच्या घरी तासभर खलबतेही केली. जयंत पाटील यांनी हा संपूर्ण अहवाल राष्ट्रवादी काँग्रेसचे सर्वेसर्वा शरद पवार यांच्यापुढे ठेवला. त्यानंतर पवार यांनी वारजूकर यांना चर्चेसाठी आमंत्रण दिले असल्याची माहिती आहे.
वारजूकर यांनी राष्ट्रवादी काँग्रेसमध्ये प्रवेश केला तर विधानसभा क्षेत्रातील काँग्रेसमधील एक गट सुखावणार असला तरी काँग्रेसला मोठा धक्का बसेल असे बोलले जात आहे. गेल्या २० वर्षांपासून वारजूकर परिवार या क्षेत्राशी जुळला आहे. याबाबत डाॅ. सतीश वारजूकर यांनी मला यावर सध्या काहीही बोलायचे नाही. काय हालचाली होतात ते येणारा काळच सांगेल, अशी सूचक प्रतिक्रिया दिली.