ऊर्जानगरात सभा : महाराष्ट्र अंनिसची मागणीचंद्रपूर : महाराष्ट्र अंधश्रद्धा निर्मूलन समितीचे संस्थापक शहीद डॉ. नरेंद्र दाभोळकर यांच्या निर्घृण खुनाला ३६ महिने आणि त्याच धर्तीवर ज्येष्ठ समाजसुधारक काम्रेड गोविंद पानसरे यांचे खुनाला १८ महिने होऊनही त्यांचे मारेकरी व मुख्य सूत्रधार अद्याप मोकाटच आहेत. महाराष्ट्र शासनाने या दोघांच्या खुनाच्या तपासाबाबत अक्षम्य दिरंगाई केलेली असल्यामुळे डॉ. दाभोळकर यांचे तिसऱ्या स्मृतीदिनी ऊर्जानगर चंद्रपूर येथे आयोजित करण्यात आलेल्या सभेमध्ये महाराष्ट्र अंनिसचे कार्यकर्ते व समितीच्या हितचिंतकांनी तीव्र निषेध केला. पुरोगामी महाराष्ट्रातील संत व समाजसुधारकांच्या कार्याचे स्मरण करुन या दोघाच्या खुनांचा तपास यापुढे महाराष्ट्र शासनाने विनाविलंब लावावा, अशी मागणी या सभेमध्ये करण्यात आली. तसेच डॉ. दाभोळकर व पानसरे यांच्या मारेकऱ्यांना व मुख्य सूत्रधारांना कधी पकडणार, या आशयाची पत्रे लिहून महाराष्ट्राच्या मुख्यमंत्र्यांना उपस्थितांनी पाठविली आहे. या सभेमध्ये जाधव यांनी मार्गदर्शन केले. सभेचे संचालन ऊर्जानगर शाखेचे कार्यवाह नारायण चव्हाण यांनी केले. (प्रतिनिधी)
दाभोळकर, पानसरे खुनाचा तपास करा
By admin | Updated: August 31, 2016 00:45 IST