देशातील सर्वात उत्तम बॉटनिकल गार्डन होणार

विसापूर येथे तयार करण्यात येणारे बॉटनिकल गार्डन हे देशातील सर्वात उत्तम गार्डन होणार असून वनस्पती शास्त्राचा...

सुधीर मुनगंटीवार : विसापुरातील बंगळुरुच्या धर्तीवर तयार होणाऱ्या बॉटनिकल गार्डनच्या संरक्षण भिंतीचे भूमिपूजनबल्लारपूर : विसापूर येथे तयार करण्यात येणारे बॉटनिकल गार्डन हे देशातील सर्वात उत्तम गार्डन होणार असून वनस्पती शास्त्राचा अभ्यास करण्यासाठी विसापूर गार्डन खुले विद्यापीठ असेल, असे मत पालकमंत्री सुधीर मुनगंटीवार यांनी व्यक्त केले.बल्लारपूर मार्गावर असलेल्या विसापूर येथे बंगळुरुच्या धर्तीवर निर्माण करण्यात येणाऱ्या बॉटनिकल गार्डनच्या संरक्षण भिंतीचे भूमिपूजन ना. सुधीर मुनगंटीवार यांच्या हस्ते करण्यात आले, त्यावेळी ते बोलत होते.वनविकास मंडळाचे अध्यक्ष चंदनसिंह चंदेल हे कार्यक्रमाच्या अध्यक्षस्थानी होते. मुख्य वनसंरक्षक तथा सामाजिक वनीकरणचे उपमहासंचालक महीप गुप्ता, अधीक्षक अभियंता डी.के. बालपांडे, सामाजिक वनीकरण उपसंचालक डी.आर. काळे व कार्यकारी अभियंता मनोज जयस्वाल प्रमुख पाहुणे म्हणून उपस्थित होते.सात कोटी रुपये खर्च करून ही संरक्षण भिंत बांधण्यात येत असून २५० हेक्टरवर बॉटनिकल गार्डन निर्माण करण्यात येणार असल्याचे यावेळी ना. मुनगंटीवार यांनी सांगितले. उत्तमातील उत्तम गार्डन तयार करण्यात येणार असून यामुळे विसापूर येथील युवकांना मोठ्या प्रमाणात रोजगार प्राप्त होणार आहे. बॉटनिकल गार्डनला भेट देण्यासाठी दरवर्षी हजारो पर्यटक येतील, असेसी ते म्हणाले. तीन वर्षांत उद्यान पूर्ण करण्यात येणार असल्याचे त्यांनी सांगितले. २५० कोटी रुपये खर्च करून विसापूरजवळ सैनिकी शाळा उभारण्यात येणार असून सैनिकी शाळेमुळे विसापुरची अर्थव्यवस्था बदलणार आहे. विसापूरला आपण विविध विकास कामे केली असून येथील चित्र बदलणार असल्याचे ते म्हणाले.१९९५ पासून विसापूरची जनता आपल्या पाठीशी उभी राहिली. म्हणून विसापुरचा विकास करणे माझे कर्तव्य आहे. रस्त्यांसाठी २० लाख रुपये मंजूर केले. स्मशानभूमी रस्ताही मंजूर करण्यात आला आहे. बल्लारपूर येथील रेल्वे प्लॅटफॉर्मची उंची वाढविण्यासाठी रेल्वे मंत्र्यांना आपण विनंती करणार असल्याचेही त्यांनी यावेळी आपल्या भाषणातून स्पष्ट केले. निवेदनात नमूद केलेली सर्व विकास कामे पूर्ण करण्याचा प्रयत्न केला जाईल. वनस्पती उद्यानामुळे मोठ्या प्रमाणात रोजगार निर्माण होईल. टाटा ट्रस्टच्या माध्यमातून विकासाचा आराखडा तयार करत आहोत. येथील शेतकऱ्यांच्या शेतात विहीर खोदण्याची योजना राबविली जाईल. आरोग्य केंद्र यापेक्षाही उत्तम करणार व सर्व साहित्य देणार असल्याचे ना. मुनगंटीवार यांनी सांगितले.प्राथमिक आरोग्य केंद्र्र व प्राथमिक शाळेच्या नवीन इमारतीचा लोकार्पण सोहळा विसापूर येथे ना. मुनगंटीवार यांच्या हस्ते पार पडला. त्यानंतर विसापुरातील शिवाजी चौकात सभा घेण्यात आली. जिल्हा परिषदेचे प्रभारी मुख्य कार्यकारी अधिकारी अशोक शिरसे, आदी यावेळी उपस्थित होते. (शहर प्रतिनिधी)