चंद्रपूर : अधिवक्त्यांना पारिवारिक वैद्यकीय विमा योजना लागू करण्याची मागणी अखिल भारतीय अधिवक्ता परिषदेतर्फे जिल्हाधिकाऱ्यांमार्फत केंद्रीय मंत्री रविशंकर प्रसाद यांना दिलेल्या निवेदनातून केली आहे.
अखिल भारतीय अधिवक्ता परिषद लखनऊमध्ये झालेल्या राष्ट्रीय संमेलनात केंद्र सरकारने सर्व अधिवक्तांना पारिवारिक वैद्यकीय विमा योजना लागू करण्याचा ठराव केला होता. त्या अनुषंगाने ही मागणी करण्यात आली. अखिल भारतीय अधिवक्ता परिषदेचे जिल्हा अध्यक्ष ॲड. अभय कुल्लरवार म्हणाले, कोरोनामुळे अनेक अधिवक्तांच्या व्यावसायिक उत्पन्नावर प्रभाव पडला असून आर्थिक अडचणींचा सामना करावा लागत आहे. यामुळे सरकारने वकिलांच्या परिवाराच्या सुरक्षेकरिता पारिवारिक वैद्यकीय विमा योजना लागू करावी. तर अधिवक्ता परिषदेचे सचिव व सहायक सरकारी अधिवक्ता ॲड. संदीप नागपुरे अधिवक्त्यांच्या कुटुंबांना केंद्र सरकारतर्फे लाभ मिळत नाही. त्यामुळे त्यांना आर्थिक त्रास सहन करावा लागतो. त्यामुळे पारिवारिक वैद्यकीय विमा योजनेची अंमलबजावणी करावी, अशी मागणी केली. निवेदन देताना परिषदेचे कोषाध्यक्ष ॲड. अमन मारेकर, ॲड. अभय पाचपोर, ॲड. सतीश भोयर, ॲड. गिरीश मार्लीवार, ॲड. विनय लिंगे, ॲड. प्रवीण पिसे, ॲड. जयप्रकाश पांडे, ॲड. गोपाल पाटील, ॲड. राशिद शेख, ॲड. विनोद मोडघरे, ॲड. व्यंकटेश श्रिरामुला, ॲड. भूषण वांढरे, ॲड. अमर बनकर आदी उपस्थित होते.