मेहकर : महाराष्ट्र सरकारने मागासवर्गीय कर्मचारी यांच्या पदोन्नतीसंबंधी काढलेला अन्यायकारक अध्यादेश मागे घेण्याची मागणी महाराष्ट्र प्रदेश काँग्रेस सेवादलचे सरचिटणीस तथा मेहकरचे माजी नगरसेवक शैलेश बावस्कर यांनी सोनिया गांधी यांना दिलेल्या पत्रात म्हटले आहे़
पत्रात म्हटले आहे की, ७ मे २०२१ रोजी महाराष्ट्र राज्य सरकारने जीआर काढून पदोन्नतीमधील आरक्षण रद्द करण्याचा निर्णय जाहीर केला आहे. राज्याच्या सेवेत असलेल्या हजारो मागासवर्गीय कर्मचाऱ्यांवर अन्याय करणारा हा निर्णय असून, राज्य सरकारने हा निर्णय त्वरित मागे घ्यावा, अशी मागणी सगळीकडून करण्यात येत आहे. या जाचक अध्यादेशातून सुटका मिळवून देण्यासाठी महाराष्ट्र सरकारला योग्य दिशानिर्देश देऊन हा अध्यादेश त्वरित रद्द करण्यासाठी आदेश द्या, अशी मागणी पत्रात केली आहे़