गजानन सोनोने / टेंभुर्णा (जि. बुलडाणा): राष्ट्रीय महामार्गावर वसलेले गाव म्हणून ओळख असलेल्या पिंप्री गवळीला आता नवी ओळख प्राप्त झाली आहे. गावातील अनेकांनी पेंटिंगचा व्यवसाय स्वीकारल्याने या गावाला आता ह्यपेंटरचे गावह्ण म्हणून ओळखले जाते. तालुक्यातील अतिशय पुरातन गाव असलेल्या पिंप्री गवळी या गावाची लोकसंख्या सुमारे अडीच हजार आहे. अडीचशेच्या वर घरं गावात असून, घरोघरी एक इसम पेंटिंगचा व्यवसाय करीत असल्याचे वास्तव आहे. यामध्ये १७५ घरे ही पेंटरची असून, खामगाव शहर तसेच आसपासच्या तालुक्यांसह मोठय़ा शहरांतील टोलेजंग इमारती आणि बंगल्यांना रंगरंगोटीकरिता त्यांना पाचारण केले जाते. दुष्काळी परिस्थितीमुळे शेती पिकत नाही. आलेली पिके अवकाळी पाऊस हाती लागू देत नाही. त्यामुळे येथील नागरिकांनी बेरोजगारीवर मात करीत हा नवीन व्यवसाय निवडला आहे. पेंटिंगच्या व्यवसायामुळे या गावातील बेरोजगारी काही प्रमाणात निकाली निघाल्याचे चित्र आहे. या गावातील पेंटरचे अनुकरण करीत आसपासच्या खेड्यांतील नागरिकही आता रंगकामाच्या या व्यवसायाकडे वळत आहेत.
जावईदेखील पेंटरच!
या गावात वास्तव्यास आलेल्या जावयांनी तसेच पाहुण्यांनी पेंटिंगचा व्यवसायच स्विकारला आहे. त्यामुळे या गावातील जावईही पेंटरच असल्याचे वास्तव आहे. या व्यवसायामुळे आर्थिक परिस्थितीवर मात करणे शक्य झाल्याचे शिवम पवार, बाळू मिस्त्री, ज्ञानेश्‍वर चोपडे यांनीही सांगितले.