रुग्णवाहिका (क्र.एमएच-२८- बी-७१३६) घेऊन रामदास पुंजाजी जाधव हा चालक मेहकर येथे एका मृत व्यक्तीचे पार्थिव घेऊन गेला होता. दरम्यान, रात्री एक वाजेच्या सुमारास मेहकरवरून बुलडाणा शहरात तो परत आला होता. दरम्यान, महावितरण कार्यालयाकडून त्रिशरण चौकाकडे जात असताना त्याच्या रुग्णवाहिकेचे समोरील टायर फुटल्याने त्याचे रुग्णवाहिकेवरील नियंत्रण सुटले व रस्त्याच्या कडेला पालामध्ये झोपलेल्या चिखली तालुक्यातील सोळंकी व पडोळकर कुटुंबाच्या पालामध्ये त्याची रुग्णवाहिका घुसली. त्यामध्ये उपरोक्त पाचही जण गंभीर जखमी झाले.
या घटनेची माहिती मिळताच बुलडाणा शहर पोलिसांनी त्वरित घटनास्थळ गाठून जखमींना बुलडाणा जिल्हा सामान्य रुग्णालयात उपचारासाठी हलविले. यातील अनिल पडोळकर याचा बुलडाणा रुग्णालयात उपचारादरम्यान मृत्यू झाला, तर गंभीर अवस्थेतील अन्य चौघांना अकोला येथे उपचारासाठी हलविण्यात आले. अकोला येथे रुग्णालयात उपचारादरम्यान माया पडोळकरचा मृत्यू झाला. अन्य तिघांवर तेथे उपचार करण्यात येत आहेत. पडोळकर व सोळंकी कुटुंब हे बुलडाणा शहरात त्रिशरण चौक परिसरात विळे, कुऱ्हाडी, तवे विकण्याचे काम करीत होते. रस्त्याच्या कडेलाच ते पाल टाकून झोपत होते. याप्रकरणी पोलिसांनी रुग्णवाहिका चालकाविरोधात गुन्हा दाखल केला आहे.
--डाव्या बाजूकडील टायर फुटले--
रुग्णवाहिकेचे समोरील डाव्या बाजूचे टायर फुटल्याने हा अपघात घडला. यात चालक रामदास पुंजाजी जाधव याचे वाहनावरील नियंत्रण सुटले आणि रस्त्याच्या कडेलाच पालामध्ये झोपलेल्या या कुटुंबातील दोघांचा मृत्यू झाला. सध्या पोलिसांनी रुग्णवाहिकाही ताब्यात घेतली असून, चालक रामदास पुंजाजी जाधव याची चौकशी करण्यात येत असल्याचे तपासी अधिकारी जयसिंग पाटील यांनी स्पष्ट केले.