हगणदरीत जाणाऱ्यांची ‘सायंकाळ’ही होणार वाईट!

खामगाव: शहरातील उघड्यावरील हगणदरीला आळा घालण्यासाठी पालिका प्रशासनाच्यावतीने कठोर पावलं उचलल्या जात आहेत. गुड मॉर्निंग पथकाची वेळ चुकवून उघड्यावर ‘शौच’ करणाऱ्यांची आता पुढे खैर नसल्याचे संकेत आहेत. गुड मॉर्निंग पथकाच्या धर्तीवर गुड इव्हिनिंग पथकाची पालिका प्रशासनाकडून तयारी करण्यात आली आहे. त्यामुळे उघड्यावर हगणदरी करणाऱ्यांची सायंकाळही आता वाईट होणार असल्याचे संकेत आहेत. स्वच्छ महाराष्ट्र अभियानांतर्गत शहरात उघड्यावरील हगणदरी रोखण्यासाठी प्रयत्न केले जात आहे. पालिका प्रशासनाकडून गेल्या काही दिवसांपासून विविध उपाययोजना आणि जनजागृतीही केल्या जात आहे. दरम्यान, पालिका प्रशासनाच्या सूचना आणि कारवाईकडे कानाडोळा करणाऱ्यांविरोधात पालिका प्रशासनाने धडक मोहीम हाती घेतली आहे. यामध्ये टमरेल जप्ती मोहीम, उघड्यावर शौच करणाऱ्यांची ‘वरात ’ आदी उपाययोजना करण्यात आल्या. दरम्यान, उघड्यावरील हगणदरी रोखण्यासाठी खामगाव पालिकेच्यावतीने गुड मॉर्निंग पथकही कार्यान्वित आहेत. तथापि, या पथकाची वेळ चुकवून उघड्यावर हगणदरी करणाऱ्यांची संख्या लक्षात घेता, पालिका प्रशासनाच्यावतीने आता गुड इव्हिनिंग पथकही कार्यान्वित करण्यात आले आहे. गुड मॉर्निंग पथकाच्या धर्तीवरच गुड इव्हिनिंग पथक कार्य करणार आहे.