लोकमत न्यूज नेटवर्क
मेहकर : विविध विकासकामे करताना कंबरखेड गवंढाळा येथील पाणीपुरवठ्याची पाईपलाईन ब्लाॅक झाली आहे, त्यामुळे गावात भीषण पाणीटंचाई निर्माण झाली आहे. याविषयी वारंवार निवेदने देऊनही दखल न घेतल्याने सरपंच ताई गजानन जाधव व गजानन निवृत्ती जाधव यांनी एमएसआरडीसी कार्यकारी अभियंता अधिकारी उदय भरडे यांचा खुर्चीला रिकाम्या बाटल्या व बांगड्यांचा हार घालून निषेध केला.
ए़. जी़. कन्स्ट्रक्शन, औरंगाबाद यांनी गवंढाळा गावातील सिमेंट नाल्याचे बांधकाम, शेतकऱ्यांच्या रस्त्यावर सिमेंट पाईप आणि प्रवासी निवारा आदींचे बांधकाम केले. या बांधकामामुळे गावातील पाणीपुरवठा करणारी पाईपलाईन ब्लॉक झाली आहे. त्यामुळे गवंढाळा गावात भीषण पाणीटंचाई निर्माण झाली आहे. महिलांसह ग्रामस्थांना पाण्यासाठी भटकंती करावी लागत आहे. ९ मार्च २०२१ रोजी मेहकर - जानेफळ रस्त्यावर पाईपलाईन नवीन करून देण्यात यावी तसेच गावात झालेले पेव्हर ब्लॉकचे काम बोगस करण्यात आले आहे, त्याची चौकशी करून बसवलेले पेव्हर ब्लॉक काढून पुन्हा नवीन बसविण्यात यावेत, या मागणीसाठी आंदाेलन केले हाेते. त्यावेळी एमएसआरडीसीचे अधिकारी दिनकर शिंदे आणि नमन शिंदे यांनी गावातील प्रश्न लवकर मार्गी लागतील, असे लेखी आश्वासन पूर्ण करताना रस्ता करुन दिला होता. त्यामुळे रास्ता राेकाे आंदाेलन मागे घेण्यात आले हाेते. त्यानंतर पुन्हा १६ एप्रिल राेजी एमएसआरडीसीचे बरडे यांना निवेदन दिले. यापूर्वीही ग्रामपंचायतीने निवेदन दिले हाेते. या सर्व कामासंदर्भात गजानन जाधव आणि सरपंच ताई जाधव यांनी ठिय्या आंदाेलन केले. कार्यालयात कुणीही नसल्याने कार्यकारी अभियंता भरडे यांच्या रिकाम्या खुर्चीला बाटल्यांचा हार घालून ठिय्या आंदोलन सुरु केले. सायंकाळी ६ वाजेपर्यंत कुठल्याही अधिकाऱ्यांनी आंदोलकांशी चर्चा केली नाही.