बुलडाणा : जिल्ह्यात कायदा व सुव्यवस्था अबाधित रहावा यासाठी बुलडाणा पोलीस वेगवेगळे ऑपरेशन राबवत आहे. याचाच एक भाग म्हणून दोनपेक्षा अधिक गुन्हे दाखल असलेले किंवा दोष सिद्ध झालेल्या गुन्हेगारांना जिल्ह्यातून हद्दपार करण्यासाठी किंवा त्यांच्यावर अंकुश ठेवून प्रतिबंधित करण्यासाठी जिल्हा पोलिसांनी पाउले उचलली आहेत. अशा गुन्हेगारांची ‘कुंडली ’ गोळा करण्याचे काम सुरू असून, आता हे सराईत गुन्हेगार पोलिसांच्या रडावर आले आहेत.
धार्मिक सण उत्सव काळात जिल्ह्यात कुठलाही अनुचित प्रकार घडू नये, सोबतच शहर आणि गावाची शांतता भंग होऊ नये म्हणून जिल्हा पोलीस अधीक्षक अरविंद चावरीया, अपर पोलीस अधीक्षक बजरंग बनसोडे यांच्या मार्गदर्शनाखाली जिल्ह्यातील स्थानिक गुन्हे शाखेचे पोलीस निरीक्षक बळीराम गिते यांच्यासह सर्वच पोलीस स्टेशनचे पोलीस निरीक्षक गावगुंड आणि सराईत गुन्हेगारांची माहिती गोळा करीत आहेत. या गावगुंडावर प्रतिबंधात्मक कारवाई करण्यासाठी त्या गुंडांच्या प्रत्येक हालचालीवर बारकाईने लक्ष ठेवले जात असून,काहींना तडीपार करण्यात आले आहे. तर अनेकांना पुढील काही दिवसांतच जिल्ह्यातून हद्दपार केले जाणार असल्याची माहिती देण्यात आली आहे.
१७ गुन्हेगारी टोळ्यांवर केली जाणार कारवाई
मुंबई पोलीस कायदा १९५१ कलम ५५ नुसार जिल्ह्याच्या हद्दीतील गुन्हेगारी टोळ्यांना जिल्ह्यातून हद्दीपार करण्यात येते. यानुसार जिल्ह्यातील १७ गुन्हेगारी टोळ्यांना प्रतिबंधित करण्याची प्रक्रिया सुरू असून, या टोळ्यांची चाचपणी केली जात आहे. तर ज्या पोलीस स्टेशन हद्दीत या टोळ्या येतात त्या पोलीस स्टेशनचे पोलीस अशांवर टोळ्यांवर बारकाईने लक्ष ठेवून आहेत.
हे गुन्हेगार आहेत पोलिसांच्या हिटलिस्टवर
मिळालेल्या माहितीनुसार, शरीर आणि मालमत्तेचे गंभीर स्वरुपाचे गुन्हे दाखल असलेले १५० गुन्हेगार, तर गुन्हा करून दोषसिद्ध झालेले ७५ गुन्हेगार, यासोबतच दारुचे दोनपेक्षा अधिक गुन्हे दाखल असलेले ३२६ जण, तर गुन्हे केले आहेत मात्र, ते मोकाट फिरत आहेत असे ५२ गुन्हेगार तर कलम ११० अन्वये दोनपेक्षा अधिक गुन्हे दाखल असलेले ४०० गुन्हेगार बुलडाणा पोलिसांच्या रडावर असून, यातील अनेकांवर प्रतिबंधात्मक कारवाई करण्यात आली आहे. तर पुढील काळात यातील अनेकांवर कारवाई होणार असल्याची माहिती आहे.
९ झोपडपट्टी दादांची केली जात आहे कुंडली तयार
महाराष्ट्र झोपडपट्टी दादा, हातभट्टीवाले, औषधी द्रव्यविषयक गुन्हेगार व धोकादायक व्यक्ती यांच्या विघातक कृत्यांना आळा घालण्याच्या कायद्यांतर्गत (एमपीडीए) जिल्ह्यातील ९ झोपडपट्टी दादाही पोलिसांच्या रडावर आहेत. या गुन्हेरांचाही कुंडली गोळा करण्याचे काम सुरू आहे. त्यातील चिखली येथील एकावर कारवाई झाली असून, उर्वरिताना स्थानबद्ध केले जाणार आहे.
अनेक सराईत गुन्हेगारांची माहिती गोळा झाली असून, त्यांच्या प्रत्येक हालचालीवर लक्ष ठेवले जात आहे. तर पुढील काही दिवसांत जिल्हा पोलीस अधीक्षक अरविंद चावरीया यांच्या मार्गदर्शनाखाली प्रतिबंधात्मक मोहीम मोठ्या प्रमाणात राबविण्यात येणार आहे.
-बळीराम गिते, पोलीस निरीक्षक, स्थानिक गुन्हे शाखा.