लोकमत न्यूज नेटवर्कसिंदखेड राजा : तालुक्यामध्ये अस्तित्वात असलेल्या खडकपूर्णा नदी पात्रात रेतीचे फार मोठे नैसर्गिक साठे होते. महसूल खात्यांतर्गत गौण खनिजापासून सन २०१६-१७ या वर्षात एकूण चार रेती घाटाच्या लिलावापासून २ कोटी ९८ लाख ५८ हजार रुपये महसूल शासनाला मिळाला.
तहसीलदार संतोष कणसे यांनी मुरुम व मातीला तात्पुरते परवाने देऊन २ लाख ६३ हजार महसूल जमा केला. तर १ एप्रिल २०१७ पासून आजपर्यंत अवैध रेती माफियाकडून ७ लाख ८९ हजार रुपये दंड वसूल केला. तात्पुरते परवाने देऊन ५० हजार महसूल जमा करण्यात महसूल विभागाला यश आले, असा एकूण ३ कोटी २१ लाख १३ हजार महसूल शासनाला वसूल करून देण्यात आल्याची माहिती तहसीलदार संतोष कणसे यांनी दिली. चार रेती घाटांच्या लिलावामधून शासनाला एका वर्षात २ कोटी ९८ लाख ५८ हजार महसूल मिळाला असला, तरीही तहसीलदार संतोष कणसे यांनी महसूल अधिकारी, कर्मचारी यांच्या पथकाने अवैध रेती रोखण्यासाठी धडक कार्यवाही करून एका वर्षात ७७ प्रकरणात ११ लाख ५३ हजार दंड वसूल केला. मुरुम व माती उत्खनन करण्यासाठी तात्पुरता परवाना देऊन ३ लाख १३ हजार महसूल गोळा केला आणि १ एप्रिल २०१७ ते आजपर्यंत ४८ प्रकरणांत ७ लाख ८९ हजार रुपये दंड वसूल करून शासनाला एकूण ३ कोटी २१ लाख १३ हजार महसूल गोळा करण्यासाठी तहसीलदार कणसे, नायब तहसीलदार एच.डी. वीर व महसूल पथकाने परिश्रम घेतले.