साखरखेर्डा प्राथमिक आरोग्य केंद्राअंतर्गत २३ खेडी येतात. सहा उपकेंद्र असून, एकाही उपकेंद्रावर लस उपलब्ध नाही. दर आठवड्याला केवळ १०० ते २०० लसी उपलब्ध होत असल्याने २० टक्केही लसीकरणाचे काम पूर्ण झाले नाही. कोरोना संसर्गजन्य आजार रोखण्यासाठी, किंबहुना आपल्याला आजार होऊ नये, यासाठी खबरदारी म्हणून साखरखेर्डा प्राथमिक आरोग्य केंद्रात दररोज ४०० ते ५०० नागरिक सकाळपासून लस घेण्यासाठी ठाण मांडून बसतात. आता लस येईल, दुपारला येईल या आशेवर दिवसभर रांगेत ताटकळत बसतात. यामध्ये ४५ वर्षांपासून ते ८०, ८५ वयोवृद्धांचा समावेश असतो. मोहाडी येथील दोन वयोवृद्ध गेल्या सोमवारपासून दररोज लसीकरिता प्राथमिक आरोग्य केंद्रात हजेरी लावत आहेत. परंतु, त्यांना लस मिळाली नाही. आज त्या दोन वयोवृद्ध पती-पत्नीला लस टोचून घ्यावी लागली. असे कितीतरी वृद्ध आज लसीकरण केंद्रावर लसीकरिता ताटकळत उभे राहिले होते. दुपारी १२ पर्यंत लस उपलब्ध झाली नव्हती. त्यानंतर केवळ १०० लस उपलब्ध झाल्याने १०० व्यक्तींनाच लस देण्यात आली. इतर नागरिकांना मात्र परत जावे लागले.
केंद्रावर पोलीस बंदोबस्त
दुसरी लस टोचून घेण्यासाठी नागरिकांची गर्दी वाढत असल्याने प्राथमिक आरोग्य केंद्रातील कर्मचाऱ्यांची डोकेदु:खी वाढली आहे. त्यात नागरिकांच्या रोषालाही सामोरे जावे लागत आहे. शुक्रवारी १२ वाजता नागरिकांना शांत करण्यासाठी पोलीस कर्मचाऱ्यांना पाचारण करण्यात आले होते. बीट जमादार रामदास वैराळ आणि पोलीस कर्मचाऱ्यांनी नागरिकांना शांत करून सर्वांना लस मिळेल. परंतु, केवळ १०० जणांनाच लस मिळाल्याने अनेकांना परत जावे लागले.
कोरोनाचे वाढते रुग्ण पाहाता राजकीय पक्षांनी पक्षभेद बाजूला सारून तालुक्यातील चारही प्राथमिक आरोग्य केंद्रात लस उपलब्ध करून द्यावी. नागरिकांना दिलासा द्यावा.
अशोक खरात,
माजी सरपंच, शिंदी.