पाइपलाइनच्या कामाचा प्रश्न सुटला

येथील सिव्हील काॅलनीमधील अनेक वर्षांपासून प्रतीक्षेत असलेल्या पाइपलाइन कामास लवकरच प्रारंभ होणार आहे. प्रभाग क्रमांक ६ मध्ये १.४६ कोटी रुपयांच्या पाणीपुरवठा पाइपलाइन कामांस मान्यता देण्यात आली आहे. देऊळगाव राजा नगरपालिका क्षेत्रात असूनसुद्धा नव्याने अनेक वर्षांपासून समाविष्ट असलेल्या रहिवासी भागात न.प.च्या पाणीपुरवठा पाइपलाइन नसल्याकारणाने नागरिकांना अडचणींना सामोरे जावे लागत होते. वाढीव वस्तीमध्ये पाणीपुरवठा करणे हे ध्येय समोर ठेवून गेली अनेक वर्षे पाठपुरावा सुरू होता. पाणीपुरवठामंत्री ना. गुलाबराव पाटील, खा. प्रतापराव जाधव, माजी आ.डाॅ. शशिकांत खेडेकर यांच्या मार्गदर्शनात नगराध्यक्षा सुनीताताई शिंदे व पाणीपुरवठा सभापती प्रवीण गोविंदराव झोरे यांच्या प्रयत्नामुळे या कामांसाठी निधी प्राप्त झाला आहे. पाइपलाइनच्या कामाबाबत ३० एप्रिल रोजी कंत्राटदाराला काम सुरू करण्याचा आदेश नगरपालिकेद्वारे प्राप्त झाला आहे.