तुरीचे दर घसरले

तुरीचे दर घसरले

बुलडाणा : बाजारात तुरीच्या दरात घट झाली आहे. त्यामुळे भाववाढीच्या अपेक्षेने तुरीची साठवणूक करणारे शेतकरी अडचणीत सापडले आहेत. तूर विकण्यासाठी आता शेतक-यांना भाववाढीची प्रतीक्षा करावी लागणार आहे.

---

कच-याची कोंडी सुटेना

मोताळा : बसस्थानकासमोर गत काही महिन्यांपासून कच-याचे साम्राज्य आहे. कच-याची समस्या निकाली काढण्यासाठी नगरपंचायत प्रशासनाचे अक्षम्य दुर्लक्ष होत आहे. कोरोनाकाळात स्वच्छता ठेवण्याची मागणी शे. बिलाल यांनी नगरपंचायतीकडे केली आहे.

-----

स्मार्ट कार्ड वितरणाची प्रक्रिया सुरू

बुलडाणा : स्मार्ट कार्डसाठी डिसेंबर २०२० ते जानेवारी २०२१ दरम्यान नोंदणी करणा-या ज्येष्ठ नागरिकांना एसटी महामंडळाकडून स्मार्ट कार्ड वितरणाची प्रक्रिया सुरू करण्यात आली आहे. ज्येष्ठ नागरिकांनी संबंधित बसस्थानकावरून स्मार्ट कार्ड कार्यालयीन वेळेत नेण्याचे आवाहन केले आहे.

----

कोरोना लसीकरणाचा वेग वाढवा!

बुलडाणा : जिल्ह्यात कोरोना विषाणू संक्रमणाच्या रुग्णांच्या संख्येत सातत्याने वाढ होत आहे. त्यामुळे कोरोनाचा उद्रेक असलेल्या शहरांमध्ये लसीकरणाचा वेग वाढविण्याची मागणी विनोद सोनोने यांनी निवेदनाद्वारे केली आहे.

--------

अवकाळी पावसामुळे आंब्याचा फुलोर झळला

मोताळा : तालुक्यात गत आठवड्यात आलेल्या अवकाळी पावसामुळे माकोडी शिवारातील सुगदेव चिमकर या शेतक-याच्या शेतातील आंब्याचा फुलोर झळला. त्यामुळे शेतक-याचे सुमारे दोन लाख रुपयांचे नुकसान झाले.

---

थकीत वसुलीसाठी पालिकांची धडक मोहीम

बुलडाणा : थकीत मालमत्ताकराच्या वसुलीसाठी जिल्ह्यातील पालिकांनी कंबर कसली आहे. मार्चअखेरीस सुटीच्या दिवशीही जिल्ह्यातील नगरपालिका आणि पंचायतींमध्ये करवसुली केली जाणार आहे.

--------

पीक नुकसानीचे पंचनामे करा

बुलडाणा : अवकाळी पावसाने झालेल्या पीक नुकसानीची तत्काळ पाहणी करून पंचनामे करण्यात यावे, अशी मागणी रयत क्रांती संघटनेच्या वतीने करण्यात आली आहे. माळविहीर, सुंदरखेड परिसरांतील पीक नुकसानीची पाहणीही संघटनेच्या वतीने करण्यात आली.

-----------

होळीसाठी नैसर्गिक रंगांची निर्मिती

बुलडाणा : निसर्ग बहुउद्देशीय संस्थेच्या वतीने होळीसाठी नैसर्गिक रंगांची निर्मिती करण्यात आली. नैसर्गिक कंद आणि झाडांच्या फुलांचा वापर रंगनिर्मितीसाठी करण्यात आला आहे.

------

लॉकडाऊन नियमांचे उल्लंघन

बुलडाणा : कोरोना संचारबंदीकाळात कोविड आपत्ती व्यवस्थापन नियमांचे उल्लंघन करणा-यांविरोधात जिल्हा प्रशासनाकडून कडक कारवाई केली जात आहे. शनिवारी सायंकाळी तीन व्यावसायिकांना दुकाने उघडी ठेवल्याबाबत दंड ठोठावला.

----------

चिंचखेडनाथ येथे पाणीटंचाई

बुलडाणा : मोताळा तालुक्यातील चिंचखेडनाथसोबतच जिल्ह्यातील चार गावांमध्ये उन्हाळ्याच्या सुरुवातीलाच तीव्र पाणीटंचाई जाणवत आहे. त्यामुळे चिंचखेडनाथ येथे टँकरने पाणीपुरवठा करण्यास प्रशासनाने मान्यता दिली आहे.

---------------

विनामास्क फिरणा-यांवर कारवाई

मोताळा : कोरोना विषाणू संसर्गाचा वाढता उद्रेक लक्षात घेता, विनामास्क फिरणा-या नागरिकांवर नगरपंचायत प्रशासनाच्या वतीने कारवाई करण्यात येत आहे. नागरिकांनी कोरोना आपत्ती व्यवस्थापन नियमांचे पालन करण्याचे आवाहन नगरपंचायत प्रशासनाकडून केले जात आहे.