--
वाहनचालक करतात ‘नो पार्किंग’मध्ये पार्किंग
बुलडाणा : बुलडाणा शहरात वाहतुकीचे नियम सर्रास तोडले जात आहेत. यासोबतच शहरातील प्रतिष्ठानासमोर कुठेही पार्किंग झोन उपलब्ध नसून, शहरात रस्त्यावरच पार्किंग केली जात आहे. यामुळे वाहतुकीस अडथळा निर्माण होत आहे, तर दुसरीकडे क्षुल्लक कारणावरून वादही उद्भविण्याचे प्रसंग शहरात घडले आहेत. तेव्हा संबंधित विभागाने शहरातील पार्किंगच्या व्यवस्थेकडे लक्ष द्यावे, अशी मागणी होत आहे.
जिल्ह्यात पावसामुळे शेतकऱ्यांमध्ये आनंद
धाड : बुलडाणा तालुक्यात मागील तीन ते चार दिवसांपासून बरसत असलेल्या पावसामुळे तालुक्यातील शेतकरी सुखावले आहेत. आता खरिपाच्या पिकांना नवसंजीवनी मिळाली असून, यंदाचा खरीप हंगाम शेतकऱ्यांसाठी लाभदायक ठरणार असल्याची शक्यता आहे. आता प्रकल्प ओव्हरफ्लो झाले आहेत. यामुळे रब्बी हंगाम बहरणार असल्याची शक्यता आहे.
बुलडाणा शहरात पाण्याचा अपव्यय
बुलडाणा : बुलडाणा शहराला पाणीपुरवठा करणारी पाइपलाइन जागोजागी फुटली असून, यामुळे लाखो लिटर पाण्याचा अपव्यय होत आहे. याकडे नगरपालिकेने वेळीच लक्ष देण्याची गरज आहे. असे झाल्यास शहरातील प्रत्येक नळधारकांना पाणी मिळण्यास मदत होणार आहे. तरी येत्या काही दिवसांत पाइपलाइन दुरुस्तीचे काम हाती घ्यावे, अशी मागणी होत आहे.