शेगाव बाजार समिती संचालकांना नोटीस!

२१ डिसेंबरला संचालकांना मिळणार बाजू मांडण्याची संधी.

शेगाव (जि. बुलडाणा): बाजार समितीच्या आर्थिक हितास बाधा पोहोचवल्याप्रकरणी जिल्हा उपनिबंधकांनी संचालकांना कलम ४५ नुसार प्रसंगी बाजार समिती सचिवांसह संचालकांना नोटीस बजावली आहे. दरम्यान, या प्रकरणात संबंधित दोषी आढळल्यास संचालकांचे पदही रद्द होऊ शकते. याप्रकरणी आता २१ डिसेंबर रोजी पुढील सुनावणी ठेवण्यात आली आहे. महाराष्ट्र कृषिउत्पन्न खरेदी विक्री (विकास व नियमन) अधिनियम १९६३ च्या कलम ४५ नुसार ही नोटीस बजावण्यात आली आहे. प्रामुख्याने दोन मुद्दय़ावर आधारित ही नोटीस आहे. त्यामुळे सध्या हा विषय शेगावमध्ये चर्चेचा आहे. बाजार समितीमधील कामकाजाबाबत मोहन हुसे यांनी दोन डिसेंबर २0१४ ला पुणे येथील पणन संचालकांकडे तक्रार दाखल केली होती. यामध्ये काही बाबी पुराव्यासह त्यांनी मांडल्या होत्या. परिणामी गंभीर स्वरूपाच्या या तक्रारीची पणन संचालकांनी दखल घेत याप्रकरणी जिल्हा उपनिबंधकांना चौकशीसाठी नियुक्त केले होते. चौकशीअंती जिल्हा उपनिबंधकांनी ३ डिसेंबर रोजी बाजार समिती संचालकांना कलम ४५ नुसार नोटीस बजावल्या आहेत. पणन संचालकांच्या निर्देशानुसार करण्यात आलेल्या चौकशीत अनेक आक्षेपार्ह बाबी आढळून आल्या आहेत. बाजार समितीच्या आर्थिक हिताला बाधा पोहोचवल्याचा ठपकाही यात ठेवण्यात आला. बाजार समितीसाठी १९८१ मध्ये ५.११ हेक्टर जमीन संपादित करण्यात आली होती. या प्रकरणात १९८६ मध्ये अवार्ड देण्यात आला होता; मात्र त्यानंतर प्रकरणातील वादींनी वाढीव मोबदल्यासाठी न्यायालयात धाव घेतली होती. या प्रकरणात नंतर तडजोड होऊन तीन हेक्टरच्या जवळ पास जमीन संबंधितांना बाजार समितीजवळ पैसा नसल्याने परत देण्यात आली होती. या प्रकरणात कुठलीही अचल संपत्ती ही पणन संचालकांनी कलम १२ नुसार मान्यता घेतल्याशिवाय परत देता येत नाही. अशा जमिनीचे व्हॅल्यूएशनही करण्याबाबत बाजार समितीने दिरंगाई केली होती. त्यानुषंगाने ही नोटीस बजावण्यात आली आहे. यासोबतच अन्य काही बाबींचा उहापोहही करण्यात आला आहे. या प्रकरणात काही लोकांना लाभ पोहोचवण्याच्या उद्देशाने बाजार समितीच्या हितास बाधा पोहोचवली गेल्याचे समोर आले आहे. आता या प्रकरणात २१ डिसेंबरला सुनावणी होणार आहे. त्यात संचालकांना त्यांचे म्हमणे मांडण्याची संधी देण्यात येणार आहे. आरोप सिद्ध झाल्यास प्रसंगी संचालकांचे सदस्यत्वही अनर्ह ठरू शकते. त्यामुळे या विषयाकडे सर्वांचे लक्ष लागले आहे.