खामगाव (जि. बुलडाणा) : टेस्ट भी, हेल्थ भी अशी भावनिक साद घालत लहान- मोठय़ांच्या मनावर अधिराज्य गाजविणार्‍या मॅगीच्या विक्रीवर राज्य शासनाने बंदी घातली आहे. मात्र, शहरात छुप्या पद्धतीने मॅगीची विक्री होत असल्याचे वास्तव आहे. शरिरासाठी घातक घटक द्रव्य निघाल्यामुळे झटपट नास्ता म्हणून ओळख असलेल्या मॅगीवर देशभर बंदी घालण्यात आली. दिल्ली, हरयाणा, पंजाब या राज्यातून हद्दपार झालेल्या मॅगीला महाराष्ट्रातूनही बाहेरचा रस्ता दाखविण्यात आला. राज्य शासनाकडून एकाचवेळी बंदी घालण्यात आल्याने, मॅगी निर्मात्या कंपनीने देशात मॅगीची विक्री थांबविली. मात्र, असे असतानाही खामगाव शहरातील विविध दुकांनांवरून मॅगीची विक्री जोरात सुरू असल्याचे लोकमतच्या ह्यस्टींग ऑपरेशनह्ण मध्ये दिसून आले. बंदी घातल्यानंतरही साठा करण्यात आलेल्या मॅगीला छुप्या पद्धतीने विकले जात आहे. दरम्यान, दुकान अथवा सुपर शॉपीच्या दर्शनी भागावर स्थान असलेली मॅगी आता दुकानातील, शॉपीमधील अडगळीच्या कोपर्‍यात गेली आहे. किरकोळ दुकानांमध्ये इतर उत्पादनाच्या पुड्याखाली मॅगी ठेवली जात आहे. ग्राहकांने मागणी करताच चोरून-लपून मॅगीच्या पॅकेटची विक्री होत असल्याचे लोकमतच्या स्टिंग ऑपरेशनमध्ये दिसून आले. यासंदर्भात अन्न व प्रशासनाचे सहा. आयुक्त भाऊराव चव्हाण यांच्याशी संपर्क साधला असता त्यांनी संपूर्ण राज्यात मॅगी विक्रीवर बंदी आहे. संबधीत कंपनीने आपला साठा परत बोलाविला आहे. मात्र, तरीही विक्री होत असेल तर त्यांच्यावर निश्‍चितच कारवाई केली जाणार असल्याचे स्पष्ट केले.
*खात्री नंतरच मॅगीची विक्री!
शहरातील विविध भागातील दुकानांमध्ये मॅगीची मागणी केल्यास सुरूवातीला दुकानदार चक्रावतो. खरोखर ग्राहक असल्याची खात्री पटल्यानंतरच अनेक विक्रेते मॅगीचा पुरवठा करतात. मात्र, नियमित ग्राहकाला कुठलेही आढवेढे न घेता, मॅगी उपलब्ध करून दिली जात असल्याचे चित्र आहे.
*असे राबविण्यात आले स्टिंग ऑपरेशन
शहरातील मुख्य बाजारपेठेसह किरकोळ परिसरातील दुकानांमध्ये जावून मॅगीची मागणी करण्यात आली. यावेळी गांधी चौकातील एका दुकानदाराने मॅगी नसल्याचे सांगत स्पष्ट नकार दिला. मात्र, मुख्य रस्त्यावरील एका डिपार्टमेंटल स्टोअर्समध्ये सुरूवातीला मॅगी नसल्याचे सांगण्यात आले. मात्र, लहान मुलाला हवी आहे, मुलगा सारखा रडत आहे, असे सांगताच, त्या दुकानदाराने नोकराला बोलावून एका खोक्यातून मॅगी बोलावून दिली. शहरातील सिव्हीललाईन, जलंब रोडवरील चिखली रोड, घाटपुरी रोड भागातील मुख्य रस्त्यासह गल्ली बोळीतील दुकानांवर मॅगीची मागणी केली असता बहुतांश दुकानांमध्ये मॅगीची विक्री होत असल्याचे दिसून आले. शंकर नगर भागातील एका दुकानदाराने चक्क दुकानांच्या दर्शनी भागावर मॅगीची पाकिटे आढळून आली.