पंढरपूर ते शेगाव पालखी मार्गाचे काम दर्जेदार करा

मेहकर : पंढरपूर ते शेगाव पालखी मार्गाच्या मेहकर येथील रस्त्याच्या निकृष्ट कामाबाबत विजय पवार यांनी उपोषण केले होते. गणपती विसर्जनानंतर या रस्त्याचे काम करण्यात येईल याबाबतचे लेखी आश्वासन दिल्यानंतरच उपोषणाची सांगता करण्यात आली होती. मात्र, अजूनही त्या कामाला सुरुवात न केल्याने परत विजय पवार यांनी आत्मदहनाचा इशारा कार्यकारी अभियंता म.रा.वि.मंडळ यांना शुक्रवारी दिला आहे. पंढरपूर ते शेगाव पालखी मार्ग मेहकर व तालुक्यात सुरू असलेले निकृष्ट दर्जाच्या कामाच्या विरोधात १ सप्टेंबरला विजय पवार यांनी उपोषण केले होते. नऊ दिवसानंतर या उपोषणाची उपविभागीय अधिकारी गणेश राठोड व महाराष्ट्र राज्य रस्ते विकास महामंडळाचे अभियंता उदय बरडे यांनी गणपती विसर्जनानंतर जी कामे बाकी आहे. ती पूर्ण करून अतिक्रमण काढण्याबाबत कार्यवाही करू असे लेखी आश्वासन दिले होते. आ. आकाश फुंडकर यांच्या हस्ते या उपोषणाची सांगता केली. परंतु, २४ सप्टेंबरपर्यंत कोणतीही कारवाई करण्यात आली नाही़ त्यामुळे विजय पवार यांनी आत्मदहन करण्याचा इशारा दिला आहे़