लोणार तालुक्यात कोल्ह्याच्या हल्ल्यात चार जखमी

आरडगावत सकळी नैसर्गिक विधीसाठी गेलेल्या नारायण येवले (६५), जगदीश नरवाडे (४०), सुबोध महादा येवले (३९) यांच्यावर हल्ला करून कोल्ह्याने त्यांना चावा घेतला. दरम्यान, त्यानंतर गाव परिसरातील गाय व बैलावरही कोल्ह्याने हल्ला केला. सकाळी ही घटना घडलेली असतानाच दुपारी तीन वाजेच्या सुमारास या कोल्ह्याने पुन्हा दाभा शिवारात शेतात काम करत असलेल्या काेंडाबाई मोरे (६५) यांच्यावर हल्ला करून त्यांनाही जखमी केले. जखमी झालेल्या या व्यक्तींची माहिती बाजार समितीचे माजी सभापती डॉ. प्रदीप मोरे यांनी ग्रामीण रुग्णालयाचे वैद्यकीय अधीक्षक डॉ. फिरोज शहा यांना दिली. त्यानंतर जखमींना लोणार येथील प्राथमिक आरोग्य केंद्रात उपचारासाठी दाखल करण्यात आले. तेथे प्रथमोपचार केल्यानंतर जखमींना बुलडाणा जिल्हा सामान्य रुग्णालयात उपचारासाठी हलविण्यात आले.