दिवाळीपासून किराणा बाजारात फारशी तेजीमंदी झाली नसली तरी हळुवारपणे काही वस्तू, धान्य महागले आहे. आषाढीनंतर श्रावणात उपवासाच्या पदार्थांना मागणी असते. मात्र, यंदा साबुदाणा, शेंगदाणे, भगर, राजगिऱ्याच्या दरात किलोमागे पाच रुपयांची तेजी झाली आहे. किराणा किरकोळ बाजारात एक महिन्यापूर्वी साबुदाण्याचे दर ५५ रुपये किलो होते. सध्या यात किलोमागे पाच रुपये वाढ झाली आहे. श्रावणात येथील बाजारात हजारो टन साबुदाण्याची आवक आणि विक्री होते. तर शेंगदाण्याचे दर ९० रुपये होते. सध्या १०० रुपये किलो भाव आहेत. तर ९०० रुपये किलो असणारी भगर यंदा स्थिर असून, तिचे भाव वाढलेले नाहीत. सध्या भगरीचे दर ९० रुपये किलोच आहेत.
आवक घटली, मागणी वाढली
शेंगदाणा : बुलडाणा जिल्ह्यातील काहीच भागात भुईमुगाचे पीक घेतले जातेे. सध्या बाजार समितीमध्ये भुईमूग खरेदी झाला आहे. मात्र, शेंगदाणे प्रक्रियेसाठी कारखान्याकडे गेला असून, याचा परिणाम आवकवर झाला आहे. एकीकडे आवक घटली तर दुसरीकडे उपवासामुळे या शेंगदाण्याची मागणी वाढली आहे. यामुळेच भावात वाढ झाली आहे.
शाबुदाणा : बाजारात येणारा शाबुदाणा राज्यातून कमी तर परराज्यातून अधिक मोठ्या प्रमाणात येतो. आता या शाबुदाण्याची आवक बुलडाणा बाजारात घटली आहे. तर आहे तो साठा ठोक विक्रेत्यांनी बाहेर काढला आहे. याचा परिणाम दरवाढीवर झाला आहे.
भगरीचे दर स्थिर
श्रावणमासाच्या आधीही आणि आताही भगरचे दर मात्र, स्थिर असल्याचे दिसून येत आहेत. भगर आधीही ९० रुपये किलोने विकली जात होती. तर आताही ९० रुपये किलोनेच विकली जात आहे. सध्या भगर जरी स्थिर असली तरी पुढील काळात मागणी वाढल्यास या भगरीचे दरही वाढू शकतात, अशी शक्यता वर्तविण्यात आली आहे.
मागणी दुप्पट वाढली
बाजारात उपवासाच्या पदार्थांची मागणी वाढली आहे. तर दुसरीकडे याच पदार्थांची आवक घटली आहे. याचा परिणाम दरावर झाला आहे. भाव दरवाढीवर झाला आहे. सध्या या पदार्थांची मागणी वाढल्याने महागाई जाणवत आहे.
-रमेश पाचपोर, किराणा व्यावसायिक.