देवेंद्र फडणवीस यांचा चिखलीत सत्कार

आधार कोविड सेंटरच्या उद्घाटनानिमित्त ना. फडणवीस चिखलीला आले होते. ना.फडणवीसांनी गत नगरपरिषद निवडणुकीदरम्यान राजाटॉवरवर झालेल्या प्रचारसभेमध्ये नगराध्यक्षा प्रिया बोंद्रे यांना नगराध्यक्षपदावर बसविण्याचे आवाहन केले होते तसेच विकासकामांना निधी कमी पडू देणार नसल्याचे जाहीर वचन चिखलीकरांना दिले होते. त्यानुषंगाने चिखलीकरांनी प्रिया बोंद्रे यांना नगराध्यक्षपदावर विराजमान करून नगरपरिषदेची धुरा भाजपच्या हातात दिली होती. यापार्श्वभूमीवर ना.फडणवीस यांनी दिलेला ‘शब्द’ पाळत मुख्यमंत्रिपदाच्या कारकिर्दीत शहराच्या विकासासाठी भरघोस निधी दिला आहे. यामध्ये शहरातील प्रमुख मार्गांच्या नवनिमिर्तीसाठी काेट्यवधी रुपये त्यांच्या मुख्यमंत्रिपदाच्या कार्यकाळात मंजूर करण्यात आले. सोबतच इतर अनेक विकासकामांचा चालना मिळाली आहे. त्यामुळे ना.फडणवीस यांच्याप्रती कृतज्ञता व्यक्त करण्यासाठी त्यांच्या शहर आगमनप्रसंगी नगराध्यक्षा प्रिया बोंद्रे व युवा नेते कुणाल बोंद्रे यांनी त्यांचा सत्कार केला.