१३ कोटींतून होणार बुलडाणा जिल्ह्याचा विकास!

बुलडाणा जिल्ह्यातील पालिकांना १२ कोटींचा निधी; नवनिर्मित दोन नगरपंचायतींना ५७ लाख.

बुलडाणा : जिल्ह्यातील नवनिर्मित दोन नगरपंचायतींसह जिल्ह्यातील ११ नगरपालिकांना राज्याकडून तब्बल १३ कोटी रुपयांचा घसघशीत निधी मिळाला आहे. १४ व्या वित्त आयोगाच्या शिफारशीनुसार राज्यातील नागरी स्थानिक स्वराज्य संस्थांना सन २0१५-१६ या आर्थिक वर्षातील मूलभूत अनुदानाचा पहिला हप्ता म्हणून ५९५ कोटी ६२ लाख रुपये मंजूर करण्यात आले आहेत. यात बुलडाणा जिल्ह्यातील नागरी स्वराज्य संस्थांच्या वाट्याला १२ कोटी ९४ लाख ६७ हजार ३00 रुपयांचा निधी आला आहे, तर दुसर्‍या हप्त्याचा निधी २0१६ मध्ये जिल्ह्याला प्राप्त होणार असल्याची माहिती जिल्हा नगर विकास विभागाकडून प्राप्त झाली आहे. या घसघसीत निधींमधून जिल्ह्यातील बुलडाणा नगरपालिकेसह खामगाव, मलकापूर, शेगाव, जळगाव जमोद, मेहकर, नांदुरा, चिखली, देऊळगावराजा, लोणार, सिंदखेडराजा या अकरा या नगरपालिकांसह नवनिर्मित मोताळा आणि संग्रामपूर या नगरपंचायतीमधील विकासाचा मार्ग प्रशस्त बनला आहे. हा निधी वितरित करण्याची जबाबदारी नगर परिषद प्रशासन संचालकांच्या आयुक्त तथा संचालकांकडे सोपविण्यात आली आहे. १४ व्या वित्त आयोगाच्या शिफारशीनुसार सन २0१५-१६ या आर्थिक वर्षांंसाठी मिळालेल्या मूलभूत अनुदानाच्या दुसर्‍या हप्त्यातून नागरी स्वराज्य संस्थांमधील विकासावर भर दिला जाणार आहे. शौचालय, रस्ते, नाल्या, स्वच्छता, पाणीपुरवठा या मूलभूत सुविधा पुरविण्यावर या निधीतून भर दिला जाणार आहे.